Avropa şirkətləri İrana yanacaq ötürür

Tehran hakimiyyəti BMT Təhlükəsizlik Şurasının tətbiq etdiyi sanksiyaları sovuşdumaq məqsədi ilə çeşidli yollara əl atır. Bir sıra başqa dövlətlər də bu qadağaya məhəl qoymamaqdadır.

“Argusmedia” adlı Avropada tanınmış nəşrin çap etdiyi hesabat İslam Respublikasının beynəlxalq yasaqlardan yayınmasından bəhs edir. Həmin sənədə əsasən Tehran hakimiyyəti Avropadan yanacaq almaqda davam edir.

İran neft şirkətinə məxsus tankerlər qitənin limanlarından alınan yancağı ölkənin Bəndər-Abbas limanına daşıyır. Bu yaxınlarda İranlılar Yunanıstandan 250 min litr yanacaq alıb. Həmin mal yunanların «Kriti Art» tankeri vasitəsi ilə daşınıb. Əslində isə bu tanekr «satılmış metallom» kimi qeydiyyatdan keçib. «Kriti Art» hazırda Pakistanın Kəraçi bölgəsindədir və oradan Bəndər–Abbasa yola düşməyə hazırlaşır.

Lent.az-ın «Argusmedia»yaya istinadən bildirdiyinə görə, ən azı daha üç tanker İrana yanacaq daşıyır. Onlardan biri Türkiyədəki «Tupras» neftayırma kompleksindədir. O biri «Atlantic Blue» Honkonq bayrağı altında üzür və Rusiyanın «Litasco» firması ilə əməkdaşlıq edir. Bu tanker Birləşmiş Ərəb Əmirliyinin Cebel Əli bölgəsindən yanacağı yükləyərək, Bəndər-Abbas yolu düşüb.

Sədrəddin Soltan