Azərbaycanlılarla kürdlər eyni məzarlıqda basdırılacaqlar

“Xalqın etiraz etməməsi üçün cümə günləri din adamları xütbələrdə durumu vətəndaşlara anladacaqlar”

Azərbaycan və kürd əsilli vətəndaşların fərqli məzarlıqda dəfn edildiyi Türkiyənin İqdır bölgəsinin Tuzluca rayonunda Bələdiyyə Məclisi ortaq məzarlıq qurulması barədə qərar qəbul edib. Lent.az-ın Türkiyə mətbuatına istinadən verdiyi məlumata görə, yeni məzarlıqda həm azərbaycanlılar, həm də kürdlər dəfn ediləcəklər.

Bələdiyyə sədri Ahmet Sait Sadrettin Türkan deyib ki, məzarlıqda azərbaycanlı və kürd ayrı-seçkiliyi aradan qalxacaq. Yeni məzarlıq rayon mərkəzindən 3 kilometr uzaqlıqda, 45 hektar ərazini əhatə edəcək: “İllərdir ki, birlik və bərabərlik içərisində yaşayan azərbaycanlılar və kürdlər öləndə də ayrılmayacaqlar. Hər məhəllədə ən azı iki məzarlıq var, bu durumu aradan qaldıracağıq. Xalqın etiraz etməməsi üçün cümə günləri din adamları xütbələrdə durumu vətəndaşlara anladacaqlar”.