Rusiya hakimiyyətinə Krım sürprizi

Rus dili Krımda regional statusdan məhrum edildi

Krımda rus dilinin regional statusa malik olması barədə Sevastopol şəhər Şurasının qəbul etdiyi qərarı Sevastopol Məhkəməsi ləğv edib.

Lent.az-ın “Nezivisimaya qazeta”ya istinadən verdiyi məlumata görə, bununla belə, Krım Ali Şurasının mayın 26-da qəbul etdiyi qərara əsasən, rus dilindən sərbəst istifadə qüvvədə qalıb və buna Konstitusiya zəmanəti verilib.

Yəni rus dili regional status qazanmasa da, Krımda sərbəst istifadə edilməsinə icazə verilib.
Qeyd edək ki, Viktor Yanukoviç prezident seçkilərindən əvvəl nisbətən rus dilinə ikinci dövlət statusu verəcəyini vəd etmişdi. Ancaq o, prezident seçildikdən sonra bu məsələni reallaşdırmadı. Prezident Administrasiyasının rəhbərinin müavini Anna Qerman deyib ki, Avropa Xartiyasına uyğun olaraq azlıqların hüquqları qorunur və regionlara sərbəst olaraq hansısa dilə regional status vermək səlahiyyəti verilib.

Sevastopol Məhkəməsinin şəhər Şurasının qərarını ləğv edərək rus dilini regional statusdan məhrum etməsi Rusiya hakimiyyəti üçün sürpriz olub. Rusiyalı müşahidəçilər bunu Viktor Yanukoviçin dolaylı olaraq vədindən imtina etməsi kimi dəyərləndirirlər.