Hillari Klinton: “Top Türkiyədədir”

“Türkiyəni üzərinə götürdüyü öhdəlikləri yerinə yetirməyə çağırırıq”

ABŞ dövlət katibi Hillari Klinton Ermənistan xarici işlər naziri Edvard Nalbəndyanla görüşdən sonra keçirilən mətbuat konfransında Türkiyəyə yönəlik çağırış edib.

Lent.az-ın “news.am” saytına istinadən verdiyi məlumata görə, dövlət katibi Sürixdə imzalanan və Türkiyə və Ermənistan arasında diplomatik əlaqələrin bərpası, sərhədlərin açılmasını nəzərdə tutan protokollarla bağlı Ermənistanın ortaya qoyduğu mövqeni alqışlayıb.

Hillari Klinton deyib ki, Ermənistan prezidenti Serj Sərkisyanın ölkəsinin mövcud problemlərə baxmayaraq, Türkiyə hazır olacağı təqdirdə münasibətlərin normallaşdırılması istiqamətində irəliyə addım atmağa hazır olduğunu söyləməsindən razı qalıb: “Biz bu qərarı bəyənirik və Türkiyəni üzərinə götürdüyü öhdəlikləri yerinə yetirməyə çağırırıq. Hər iki tərəf sülh və normallaşma prosesi üçün yollar axtarmalıdır. Ermənistan tərəfinin bu ilin aprelində verdiyi qərar rasional və uyğun bir qərardır. İndi top qarşı tərəfdə, Türkiyədədir”.