Obama komandasını təhqir edən generalı bağışlamadı

Əfqanıstandakı ABŞ və NATO qüvvələrinin komandanı tutduğu postdan uzaqlaşdırıldı

ABŞ prezidenti Barak Obama Əfqanıstandakı ABŞ və NATO qüvvələrinin komandanı, general Stenli MakKristalı bağışlamayıb. Lent.az-ın BBC-yə istinadən verdiyi məlumata görə, Barak Obama 55 yaşlı generalı tutduğu vəzifədən azad edib.

Qeyd edək ki, ABŞ prezidentini Stenli MakKristalın “Rolling Stone” jurnalına müsahibəsi hövsələdən çıxarıb. General bu müsahibəsində Barak Obama administrasiyasını təhqir edib. Həmin müsahibəsində Stenli MakKristal general deyib ki, Ağ Evdə kimlərin oturduqları barədə fikirləşmək lazımdır. Stenli MakKristal vitse-prezident Co Baydenin soyadının belə gülməli olduğunu söyləyib, milli məsələlər üzrə məsləhətçini isə axmaq adlandırıb.

Müdafiə naziri Robert Qeyts generalın davranışının yolverilməz olduğunu vurğulayıb. Sonradan Stenli MakKristal üzr istəyib, hirsli olduğu üçün müsahibəsində belə sözlər dilə gətirdiyini qeyd edib. Bununla belə, o, istefa barədə ərizə də yazmışdı. Dünən isə Barak Obama generalla görüşmüşdü.

Xatırladaq ki, dünən Əfqanıstan prezidenti Həmid Kərzai də açıqlama verərək Stenli MakKristalı müdafiə edib, onun “Taliban”a qarşı mübarizədə böyük işlər gördüyünü, yerli xalqın adət-ənənələrinə hörmətlə yanaşdığını bildirib. Ancaq bu, Barak Obamanın qərarına təsir etməyib.