Avropa üçün şok hesabat!

Avropa Birliyinin statistika qurumu olan “Eurobarometre”nin yayımladığı hesabata görə, Avropada 85 milyon nəfərə yaxın yoxsul var.

Lent.az-ın BBC-yə istinadən verdiyi məlumata görə, “Eurobarometre” bunu bu il 18-22 may tarixlərində 8 ölkədə keçirdiyi telefon sorğusunun nəticələrinə əsaslanaraq bildirib.

Sorğu zamanı 8 ölkənin vətəndaşlarına “Yoxsullaşdığınızı düşünürsünüzmü?” sualı ünvanlanıb. Yunanıstanda və Fransada sorğuya qatılanların 85 faizi, Bolqarıstanda 82 faizi, Rumıniyada 77 faizi, İtaliyada 75 faizi, Danimarka və Hollandiyada isə 55 faizi yoxsullaşdığını bildirib. Faiz nisbəti ilə götürdükdə, bu halda Avropada ən azı 85 milyon yoxsulun olduğu üzə çıxır.

500 milyon insanın yaşadığı Avropa Birliyində hər 6 nəfərdən 1-i qarşıdakı 1 ildə işini itirməkdən qorxduğunu söyləyib. Onlar işlərini itirəcəkləri halda 6 aydan artıq işsiz yaşaya bilməyəcəklərini, ehtiyatlarının tükənəcəyini dilə gətiriblər. Hesabatda yer alan digər şok doğuran məqam isə odur ki, 150 milyona yaxın avropalı yaşadıqları son 6 ayda sağlamlıqlarını qorumaqda və uşaqlarının xərclərini ödəməkdə çətinliklərlə üzləşiblər.

Avropa Birliyi qarşıdakı 10 ildə ən azı 20 milyon avropalını yoxsulluqdan qurtarmağı qarşısına məqsəd qoyub. Ancaq “Eurobarometre”nin ortaya çıxardığı mənzərə bunun asan olmayacağını göstərir.