Abdulla Gül: “Türkiyə İsraili əfv etməyəcək”

“İsrail tarixinin ən böyük səhvini etdi, Türkiyə əsla bunu əfv etməyəcək”
Lent.az-ın haberturk.com saytına istinadən verdiyi məlumata görə, bunu jurnalistlərin suallarını cavablandıran Türkiyə prezidenti Abdulla Gül söyləyib.
Abdulla Gül deyib ki, Türkiyə bunu heç vaxt unutmayacaq və lazımi addımları atacaq: “Müvafiq addımların atılması ilə bağlı fəaliyyətimiz davam edir. İsrail bu xətasından çox böyük peşmançılıq keçirəcək. Ümid edirik ki, İsrail bu xətasını başa düşər və artıq bir də belə yola əl atmaz. Dünyadakı müstəqil komissiyaların olayı qınaması önəmlidir. BMT Təhlükəsizlik Şurasının bəyanatı da önəmlidir. Dünya ayağa qalxıb”.
Türkiyə prezidenti vurğulayıb ki, Türkiyənin İsrail ilə əlaqələri əsla əvvəlki kimi olmayacaq: “İsrail səhvindən dönsə belə, münasibətlərin köhnə səviyyəyə dönməsi mümkün deyil. Bu olay dərin iz buraxıb. İsrail gələcəyi baxımından yanlışa yol verib, həyata keçirdikləri siyasət xeyirli deyil".