ABŞ Bakiyev və “Manas” arasında seçim etməlidir

“ABŞ Qırğızıstanın cənubunda terror aksiyası təşkil etmiş Maksim Bakiyevin bizə verilməsinə kömək etsin”

Əgər ABŞ Qırğızıstanın devrilmiş prezidenti Kurmanbek Bakiyevin oğlu, Böyük Britaniyada saxlanmış Maksim Bakiyevin rəsmi Bişkekə təhvil verilməsinə kömək etməsə, “Manas” bazasından məhrum olacaq.

Lent.az-ın “İnterfaks” agentliyinə istinadən verdiyi məlumata görə, bunu Qırğızıstanın müvəqqəti hökumətinin baş nazirinin müavini Azimbek Beknazarov söyləyib.

Azimbek Beknazarov bildirib ki, Qırğızıstanda bazası olan ABŞ terrorizmə qarşı mübarizə apardığını elan edir: “O halda ABŞ Qırğızıstanın cənubunda terror aksiyası təşkil etmiş Maksim Bakiyevin bizə verilməsinə kömək etsin. Əks halda, hökumət ABŞ-ın “Manas” bazasını boşaltması tələbini irəli sürəcək”.

Qeyd edək ki, ABŞ-dan Qırğızıstana dövlət katibinin müavininin rəhbərlik etdiyi nümayəndə heyəti gəlir.