Bazarlarımıza alkoqolu “əridən” sehrli içki gəlir

Artıq Fransanı qarışdırıb, Kanada, daha sonra bütün dünya ölkələrində satışa çıxarılacaq

İçildiyi an qandakı alkoqolun səviyyəsini sıfır səviyyəsinə endirən içki bu həftə Fransada satışa çıxarılıb.

Lent.az-ın “Reuters” agentliyinə istinadən verdiyi məlumata görə, içki Fransada böyük mübahisələrə yol açıb.

“Outox” adlı içkinin istehsalçıları içkini “inqilabi bir içki” kimi qiymətləndiriblər. Ancaq həkimlər bu içkiyə böyük şübhə ilə yanaşır, içki ilə bağlı elmi araşdırma aparılmadığını, onun insan sağlamlığı üçün zərərli ola biləcəyini söyləyirlər. Hesab edirlər ki, insanları daha çox alkoqollu içki içməyə və içkili avtomobil idarə etməyə həvəsləndirəcək.

“Outox” firması isə içkinin sehrli tərkibini açıqlamaq istəmir, ancaq bütün tibbi testləri keçirdiklərini və nəticənin müsbət olduğunu vurğulayıb. Fransa Səhiyyə Nazirliyi içkinin sağlamlığa zərərli olduğu isbat edilməyənə qədər bir qanuni qadağanın tətbiqinin mümkün olmadığını bildirib.

“Outox” firması içkini artıq Kanadada da satışa çıxarıb. Firma bu içkini dünyanın bütün ölkələrində satışa çıxaracağını bəyan edib.