Medvedev Türkiyədən əliboş qayıdır

Rusiya prezidenti Dmitri Medvedev Türkiyə səfəri zamanı əsas istəyinə nail ola bilməyib.

Lent.az-ın “Kommersant” qəzetinə istinadən verdiyi məlumata görə, gündəmdəki əsas məsələ Qara dənizin dibi ilə çəkiləcək Cənub Axını qaz kəmərinin Türkiyənin sahil sularından keçməsinə Ankaranın icazə verməsi ilə bağlı olub.

Qəzet yazır ki, Dmitri Medvedevin niyyəti Türkiyəyə səfəri zamanı “Cənub Axını” qaz kəməri layihəsi üzərində birgə işlə bağlı sənəd, yəni şərtlərin yer aldığı yol xəritəsi imzalamaq olub. Ancaq Türkiyə bu sənədi imzalamaqdan imtina edib.

Qeyd edək ki, Qara dəniz sahilləri turizm sektoru ilə bağlı Türkiyə üçün xüsusi əhəmiyyət daşıyır və keçən ilin avqustunda Rusiyanın baş naziri Vladimir Putinin Ankaraya səfəri zamanı burada geoloji araşdırma aparılması üçün icazə alınıb. Səfərdən öncə Rusiya mətbuatı yazırdı ki, Türkiyə bu kəmərlə ötürüləcək qazın 28 milyard kubmetrini 10 faiz ucuz almağı planlaşdırır, bunun əvəzində “Qazproma” Türkiyədə yeraltı qaz anbarları, qazla işləyən elektrik stansiyası tikməyə imkan, Türkiyənin qaz nəqli sisteminin özəlləşməsində iştirak etməyə şərait yaratmaq vəd olunur. Ancaq belə görünür ki, tərəflər razılığa gələ bilməyiblər.

Xatırladaq ki, “Cənub Axını” Orta Asiya və Azərbaycan qazını Avropaya daşımaq üçün nəzərdə tutulmuş “Nabucco” layihəsinin əsas alternatividir.