Türkiyəyə gələn ermənilərin sayı artır

Azərbaycan Türkiyəyə turist göndərən ölkələr sırasında 7-ci yerdədir

Türkiyəyə bu ilin birinci rübündə gələn turistlərin statistikası açıqlanıb.

Lent.az-ın “Milliyet” qəzetinə istinadən verdiyi məlumata görə, keçən ilin eyni dövrü ilə müqayisədə bu ilin birinci rübündə Türkiyəyə gələn turistlərin sayı 6,83 faiz artıb və 2 milyon 129 min 947 nəfərə çatıb.

Bu ilin mart ayında isə keçən ilin mart ayı ilə müqayisədə turistlərin sayında 10,35 faiz artım müşahidə olunub. Mart ayında Türkiyəni 786 min 653 turist ziyarət edib.

Ölkələr üzrə statistika da açıqlanıb. Türkiyəyə bu ilin birinci rübündə ən çox ziyarətçi Almaniyadan (16,53%) gəlib. Almaniyanı İran (13,86%), Bolqarıstan (7,93%) izləyir. Növbəti sıralarda Gürcüstan, Suriya, Rusiya, Yunanıstan, İngiltərə, Azərbaycan və Fransa yer alıb.

Mart ayında da Türkiyəyə ən çox turist Almaniyadan (18,45%) gəlib. İlk üçlükdə yenə də İran (16,96%) və Bolqarıstan (6,45%) izləyir. Növbəti yerlərdə Gürcüstan, Suriya, İngiltərə, Yunanıstan, Rusiya, Fransa və Azərbaycan gəlir.

Mart ayında Türkiyəyə gələn ermənilərin sayında da artım qeydə alınıb. Keçən ilin mart ayı ilə müqayisədə 12,24% artım olub. Əgər keçən ilin martında Türkiyəyə 2794 erməni gəlibsə, bu ilin martında bu rəqəm 3136 nəfərə çatıb. İlin birinci rübündə də keçən ilin eyni dövrü ilə müqayisədə Türkiyəyə gələn ermənilərin sayında 12,97 faiz artım olub. Başqa sözlə, əgər keçən ilin birinci rübündə Türkiyəyə 8197 erməni turist gəlibsə, bu ilin birinci rübündə bu ölkəyə 9260 erməni üz tutub.