Məmurlar Tehrandan köçürülür

Həmədan, Təbriz, Qəzvin, Şiraz, Məşhəd və İsfahan indiki İranın qədim paytaxt şəhərləridir. 1775-ci ildə Ağa Məhəmməd şah Qacar Tehranı ölkənin başkəndi elan edib. Son illərdə paytaxtın yenidən köçürülməsi ilə bağlı fikrilər dolaşırdı. Ötən il İranın ali rəhbəri ayətulla Xamneyi paytaxtın Tehrandan köçürülməsi planını təsdiqlədi.
İran hökumətinin təmsilçisi Əhməd Bozorgian bildirib ki, Tehranda yaşayan 200 min dövlət məmuru paytaxtdan çıxarılacaq. Onun sözlərinə görə, paytaxtı tərk edəcək dövlət işçilərinin maaşları 25-50 faizə qədər artırılacaq.
Lent.az-ın GünAzTV-yə istinadən məlumatına əsasən, buraya silahlı qüvvələr, rəsmi dövlət işçiləri, müqavilə əsasında çalışanlar, bank, dövlət şirkətləri, sığorta və digər dövlət müəssisələrində çalışanlar daxildir.
Bundan öncə İran prezidenti Mahmud Əhmədinijat zəlzələ təhlükəsi ucbatından paytaxtdan 5 milyon nəfərin çıxarılmasının zəruriliyindən danışmışdı.
Onun dediyinə görə, Tehran əyalətində hazırda 13 milyon 700 min nəfərdən çox insan yaşayır və burada baş verə biləcək istənilən hadisəyə hazır olmaq lazımdır.

Sədrəddin Soltan