Türmədə cəllad vakansiyası açılıb

Zimbabvedə ciddi rejimli türmədə cəllad vakansiyası açılıb. Lent.az-ın “Associated Press”ə istinadən verdiyi məlumata görə, yeni işçi axtarışına zərurət əvvəlki cəllad türməni tərk etdikdən sonra yaranıb.

O, ölkədə ölüm hökmlərini həyata keçirən yeganə şəxs olub. Ölüm hökmlərinin icraçısı cəzaları yerinə yetirmə xidməti və Ədliyyə Nazirliyi ilə müqaviləsi başa çatdıqdan sonra türməni tərk edib. Keçmiş həmkarlarının sözlərinə görə, ölüm hökmlərini edamla yerinə yetirən kişi vicdan əzabı çəkir.

Türmə rəhbərliyi hələlik cəllada əvəz tapa bilməyib. Artıq Zimbabve hökuməti ölkə sakinləri arasında yeni cəllad axtarışı haqda elan hazırlayıb. Namizədə xüsusi tələblər irəli sürülməyəcək. Gələcək cəllada orta təhsilli olması kifayətdir.

Qeyd edək ki, Zimbabvedə sonuncu dəfə ölüm hökmü 2004-cü ildə icra olunub. Ümumilikdə, Afrika ölkələrinin Böyük Britaniya müstəmləkəsindən qurtularaq, müstəqillik əldə etməyə başladıqları 1980-ci ildən Zimbabvedə 78 nəfər edam olunub. Hazırda ölümə məhkum olunanlar kamerasında hökmün icrasını 50 nəfər gözləyir.