Əhmədinejad 5 milyon nəfəri Tehrandan çıxarır

İran prezidenti dəhşətli zəlzələdən daha az itki ilə çıxmaq üçün bu addımı atır

İran prezidenti Mahmud Əhmədinejad zəlzələ təhlükəsinin mövcud olduğu Tehrandan 5 milyon insanın köçürülməsini zəruri sayır.

Lent.az-ın “haberturk.com” saytına istinadən verdiyi məlumata görə, prezident önləyici tədbir kimi bunu gərəkli hesab edir.

Mahmud Əhmədinejad bildirib ki, həmin 5 milyon insanın evi bölgədə Yer səthinin qırılma xətlərinin üzərində, riskli ərazilərdə yerləşir: “İnsanların şəhəri tərk etmələrini əmr edə bilmərik, ancaq hazırlıqlar görülməlidir. Ən azı 5 milyon insan Tehranı tərk etməlidir ki, böhran vəziyyətində şəhər daha az qələbəlik və daha rahat idarə edilə bilsin. Bu insanların Tehranı tərk etmələri üçün hökumət torpaq, aşağı faizli kredit verə bilər. Zəlzələnin nə zaman olacağını təxmin edə bilmərik. Amma zəlzələ baş versə, 13,8 milyon insanın yaşadığı Tehranı necə idarə edə bilərik?”

Qeyd edək ki, bundan əvvəl dini lider Ayətullah Əli Xamneyi hökumət orqanlarının başqa şəhərdə yerləşdirilməsini istəmişdi.