AKP hökuməti erməniləri yenə sevindirdi

Türkiyədə ikinci böyük erməni kilsəsinin bərpası ilə bağlı 4 milyon dollar ayrılıb, tender keçiriləcək

AKP hökuməti erməniləri növbəti dəfə sevindirib.

Lent.az-ın Türkiyə mətbuatına istinadən verdiyi məlumata görə, Eskişehrin Sivrihisar rayonunda yerləşən, Anadoluda ikinci böyük erməni kilsəsi sayılan “Surp Yerortutyun” kilsəsi təmir ediləcək.

Daha öncə Akdamar Kilsəsini bərpa edərək, ildə bir dəfə ibadət üçün açılmasına icazə verən AKP hökuməti “Surp Yerortutyun” kilsəsinin bərpası üçün dövlət büdcəsindən 4 milyon dollar ayırıb. Mədəniyyət və Turizm Nazirliyi gələn ay tikinti-təmir işlərini görəcək şirkətin müəyyənləşdirilməsi üçün tender keçirəcək.

“Surp Yerortutyun” kilsəsi Osmanlının ermənilərə qayğısının göstəricisi olaraq 130 il əvvəl tikilib. Kilsə təmir edildikdən sonra muzey kimi fəaliyyət göstərəcək, burada konsert və toplantılar keçirilə biləcək. Kilsədə ibadətə icazə verilib-verilmədiyi hələ açıqlanmır.