Təbrizdə konsert qadağası

İran hakimiyyəti Güney Azərbaycanın Təbriz şəhərində ənənəvi olaraq keçirilən konserti əngəlləyib. Lent.az-ın “cultradio”-ya istinadən yaydığı xəbərə görə, bu tədbirin ləğvinə səbəb ansambllardan birində iki qadının olmasıdır.

“Frans press” bildirib ki, İranda tanınmış müğənni Humayun Şairianın bu həftənin sonunda keçirilməsi nəzərdə tutulan konserti də ləğv edilib. Agentliyin məlumatına əsasən, qadınların belə çıxışları islam Respublikasının yürütdüyü siyasi-ideoloji xətlə ziddiyyət təşkil etdiyindən bu mərasimlər baş tutmayıb.

Xatırladaq ki, bu ölkədə qadınların musiqi alətlərində ifa edərək, kütləvi tədbirlərdə çıxışına icazə verilir. İslam Respublikasının qanunlarına əsasən zərif cinsin nümayəndələri ansambllarda ifa etməklə yanaşı, qruplarda oxuya da bilərlər. Ancaq onların solo oxuması yasaqlanıb. Qadınların solonu yalnız salondakı həmcinsləri üçün ifa etmək hüququ var.

Təbrizdəki hakimiyyət təmsilçiləri də bu xəbəri təsdiqləyərək, bildiriblər ki, konsertin təxirə salınmasına səbəb musiqi qrupunda qadının olmasıdır və təhlükəsizlik baxımından tədbir keçirilməyəcək.

Sədrəddin Soltan