Tehranın körfəz hikkəsi

Körfəzin adına görə Tehran hakimiyyəti az qala ərəb dövlətlərinə qarşı müharibə etmək istəyir

İranın “Kish Air” aviaşirkətində işləyən yunan stüard körfəzin adını “Fars körfəzi” deyil, “Ərəb körfəzi” adlandırdığı üçün işdən çıxarılıb.

Lent.az-ın Press TV-yə istinadən məlumatına görə, İslam Respublikasının nəqliyyat naziri Həmid Bəhbəhani bildirib ki, İranın hava məkanına daxil olandan sonra heyət körfəzə “Fars körfəzi” deməzsə, o halda həmini təyyarənin İran sərhədlərini keçməsi yasaqlanacaq.

“Mehr” agentliyi xəbər verir ki, İslam Respublikasının immiqrasiya idarəsinin başçısı Qulamrza Rzaian “məsuliyyətsizliyə və nalayiq davranışa görə” yunana verilmiş oturum izninin ləğv edildiyini və Kiş şəhərində polis tərəfindən dindirildiyini bildirib.

Xatırladaq ki, ərəblərin “Ərəb körfəzi”, farsların “Fars körfəzi” adlandırdığı bu su ərazisi tarixən Kəngər körfəzi adlanıb.

Yeri gəlmişkən, bu ilin yazında “İslam həmrəyliyi idman oyunları”nın keçiriləcəyi gözlənilirdi. “Associated Press”in məlumatına görə, bu tədbir İran İslam Respublikasının ucbatından təxirə salınıb. İslam ölkələri həmrəylik oyunları federasiyasından bildiriblər ki, İran yarışmaların loqosunda “Fars körfəzi” yazılması iddiası ilə çıxış edib. Səudiyyə Ərəbistanının təmsilçiləri medalların və mükafatların üzərindən “Fars körfəzi” ifadəsinin yığışdırılmasını tələb etmiş və bildirmişdilər ki, onun yerinə ya “Ərəb körfəzi”, ya da sadəcə, “Körfəz” yazılmalıdır.

Qeyd edək ki, “İslam ölkələri həmrəylik idman oyunları”ının keçirilməsi ilə bağlı İslam Konfransı Təşkilatı 2001-ci ildə qərar qəbul edib. İlk oyunlar 2005-ci ildə Səudiyyə Ərəbistanında gerçəkləşdirilib. Onda Özbəkistan, Albaniya və Toqo istisna olmaqla, 53 müsəlman ölkəsindən 6,5 min idmançı həmrəylik yarışmasına qatılmışdı. Bu il keçirilməsi planlaşdırılan yarışma isə əslində, ötən ilin oktyabrında gerçəkləşməli idi.

Sədrəddin Soltan