Niyazovun qızıl suyuna çəkilmiş heykəli uçuruldu

Türkmənistanda ölkənin ilk prezidenti Saparmurat Niyazovun paytaxt Aşqabadda Prezident Sarayının yanındakı Arka qülləsinin zirvəsində qoyulmuş, qızıl suyuna çəkilmiş, günəşlə bərabər fırlanan heykəli götürülüb. Lent.az-ın ‘RİA Novosti” agentliyinə istinadən verdiyi məlumata görə, ölkənin bitərəfliyinin rəmzi olan 75 metr hündürlükdəki Arka qülləsində qurulmuş bu heykəlin götürülməsi paytaxtın görünüşünün yaxşılaşdırılması istiqamətində görülən işlərlə əlaqələndirilib.

Prezident Qurbanqulu Berdıməhəmmədovun bu ilin yanvarında imzaladığı qərara görə, Ara qülləsi yenidən qurulacaq və onun hündürlüyü 20 metr artırılaraq 95 metrə çatdırılacaq. Yenidənqurma işləri 2011-ci ilin oktyabrına, Türkmənistanın müstəqilliyinin 20-ci ildönümünə qədər başa çatdırılacaq. Saparmurad Niyazovun heykəlinin yenidən qüllənin üzərində quraşdırılması isə planlaşdırılmayıb.

Qeyd edək ki, Arka 1998-ci ildə Türkiyənin “Polimeks” firması tərəfindən quraşdırılıb və 1998-ci il dekabrın 12-də təntənəli şəkildə açılışı keçirilib. Arkanın yenidən qurulması işlərini də bu firma həyata keçirəcək.