Haitidə güclü zəlzələ: minlərlə ölən var

Lent.az-ın “Associated Press” agentiliyinə istinadən verdiyi məlumata görə, zəlzələnin episentri paytaxt Part-o-Prensdən 15 kilometr uzaqlıqda yerləşir.

Bu vaxta qədər bu regionda belə güclü zəlzələ baş verməyib. Öncə 7 bal gücündə, yarım saatdan sonra isə 6 bal gücündə ikinci zəlzələ olub. Paytaxtda və qonşu şəhərlərdə ciddi dağıntılar olub. Qurbanların sayı minlərlə ölçülür. Zəlzələ nəticəsində Haitinin Prezident Aparatının binası, xeyli sayda dövlət obyektləri dağıntıya məruz qalıb.

İtkin düşənlər arasında çoxlu sayda BMT missiyasının üzvləri var. BMT-nin Haitidəki mənzil-qərargahı ciddi dağıntıya məruz qalıb. Dağıntı rayonunda telefon əlaqəsi kəsilib, elektrik enerjisinin verilişi dayanıb.

Kubanın şərqində də zəlzələ hiss olunub. Ancaq dağıntı və xəsarət alanlar yoxdur.

ABŞ, Kanada və Venesuela Haitiyə yardım göndərməyə hazır olduqlarını bildiriblər.