Məşhur imam Fransadan qovuldu

Əli İbrahim əl Sudan məscidlərdə avropalılara qarşı mücadilə aparmaqla bağlı çıxışlarıyla fransızları hövsələdən çıxarıb

Fransa məscidlərində müsəlmanları avropalılara qarşı mücadilə aparmağa səsləyən çıxışlarıyla məşhurlaşan imam Əli İbrahim əl Sudanı ölkədən çıxarılıb.

Lent.az-ın verdiyi məlumata görə, bununla bağlı Fransa daxili işlər naziri Birc Hortefeuxun yazılı açıqlaması yayılıb.

Açıqlamada bildirilir ki, radikal imam çıxışlarında zorakılığı təbliğ və təşviq etdiyi üçün Misirə deportasiya edilib. Nazir qeyd edib ki, Əli İbrahim əl Sudan təhlükəli şəxsdir: “Fransanın kəşfiyyat xidmətləri uzun müddətdir ki, bu imamı izləyir. Müsəlmanları avropalılara qarşı mübarizəyə çağıran Əli İbrahim əl Sudan aylardır ki, məscidlərdə Fransa cəmiyyətinin dəyərlərini aşağılayır, zorakılığı dəstəkləyir”.

Açıqlamada vurğulanır ki, Fransa din azadlığına nə qədər hörmətlə yanaşsa da, belə radikal imamların din azadlığı ilə heç bir əlaqəsi yoxdur.
Xatırladaq ki, Fransa 2001-ci ildən 29-u imam olmaqla, 129 radikal dinçini ölkədən xaric edib.