PKK-çı bələdiyyə sədrləri tutulublar

Bu gün Diyarbəkir Baş Prokurorluğunun sanksiyası ilə Diyarbəkir Polis İdarəsinin Terrorla mübarizə şöbəsinin əməkdaşları PKK-nın Türkiyədəki uzantısı olan Kürdüstan Topluluqlar Birliyinə (KTB) qarşı 8 rayonda eyni vaxtda axtarış əməliyyatlarına başlayıblar.

Lent.az-ın “ensonhaber.com” saytına istinadən verdiyi məlumata görə, DTP-nin qapadılmasından sonra siyasi fəaliyyətlərinə yasaq qoyulan, KTB-yə keçən bələdiyyə sədrləri də daxil olmaqla, çoxlu sayda insan saxlanılıb.

Saxlanılanlar arasında Siirtin bələdiyyə sədri Selim Sadak, Şırnakın Cizrə rayonunun bələdiyyə sədri Aydın Badak, Batmanın sabiq bələdiyyə sədri Hüseyn Kalkan, Diyarbəkirin Sur rayonunun bələdiyyə sədri Abdullah Dəmirbaş, Kayapınar rayon bələdiyyə sədri Zülküf Karatekin, Bağlar bələdiyyəsinin sədri Yüksəl Baran, Büyükşehir Bələdiyyəsinin üzvü Vəkili Ali Şimşək, qapadılan DTP-nin Diyarbəkirdəki rayon təşkilatının sabiq sədri Firat Anlı, Bağlar bələdiyyəsinin sabiq sədri Yurdusev Özsökmen də var.

Axtarışlar davam etdirilir. Saxlanılan şəxslərin mənzillərindən, iş yerlərindən kompüterlər, bəzi sənədlər götürülüb.