Lamiyə Vəliyeva kimdir? - Dördqat dünya çempionu

Lent.az “Bioqrafiya” rubrikasında bu dəfə dördqat dünya çempionu, “Paris 2024” yay olimpiya oyunlarında qızıl medal qazanmağı bacaran azərbaycanlı paraatlet Lamiyə Vəliyeva haqqında məlumat verir:

Lamiyə Vəliyeva kimdir?

Lamiyə Vəliyeva 2002-ci il aprelin 5-də anadan olub. O, doğuşdan görmə məhdudiyyəti ilə dünyaya gəlib. Lakin bu fiziki maneə onun həyat yolunda uğur qazanmasına mane olmadı. Uşaq yaşlarından etibarən Lamiyə özünü idmana həsr etməyi və həyatda aktiv iştirakçı olmağı qərarlaşdırdı.

Lamiyə Vəliyeva idmana nə vaxt başladı?

Lamiyə Vəliyeva 2015-ci ildən idmanla məşğul olur. Şəxsi məşqçisi Tofiq Əliyev, yığmada məşqçisi isə Oleq Panyutindir. Lamiyə Vəliyevanın idmana olan marağı və bacarığı erkən yaşlarında diqqət çəkdi və bu, onun gələcəkdə peşəkar idmançı olmaq yolunda ilk addımları oldu.

Lamiyə, Azərbaycan Respublikası Milli Paralimpiya Komitəsinin dəstəyi ilə idman fəaliyyətinə başlayıb. O, xüsusi olaraq görmə məhdudiyyətli idmançılar üçün nəzərdə tutulmuş yüngül atletika növlərində mübarizə aparmağa başlayıb.

Lamiyə Vəliyevanın uğurları

Lamiyə Vəliyeva 2015-ci ildə Konya şəhərində beynəlxalq turnirdə 100 metr məsafəyə qaçışda turnirin qalibi olub.

2016-cı ildə Belarusda beynəlxalq turnirdə 60 metr məsafəyə qaçışda beşinci pillənin sahibi olan Lamiyə Vəliyeva, 2017-ci ildə isə Macarıstanda XIV Avropa Yeniyetmələrinin Yay Olimpiya Festivalında mübarizə aparıb.

2018-ci ilin yanvar ayında 400 metr məsafəyə qaçışda şəhər çempionatının qalibi olub, fevral ayında isə Belarusda beynəlxalq turnirdə bürünc medal qazanıb. 2018-ci ildə U-18 Avropa Çempionatında mübarizə aparan Lamiyə Vəliyeva, 2019-cu ildə növbəti dəfə şəhər çempionatının qalibi olub.

2019-cu ilin iyun ayında o, 200 və 400 metr məsafələrə qaçışda U-18 Azərbaycan Çempionatının qalibi oldu. İyun ayında XV Avropa Yeniyetmələrinin Yay Olimpiya Festivalında çıxış eləyib.

2021-ci ilin yanvar ayında Lamiyə Vəliyeva 100 və 200 metr məsafələrə qaçışda Azərbaycan Çempionatının qızıl medallarına sahib oldu. 2021-ci ilin avqustunda isə Lamiyə Vəliyeva XVI Yay Paralimpiya Oyunlarında mübarizə aparıb.

Lamiyə Vəliyevanın "Tokio 2020" Paralimpiya Oyunlarındakı uğuru

Lamiyə Vəliyevanın karyerasındakı ən böyük uğur 2021-ci ildə keçirilən Tokio 2020 Paralimpiya Oyunlarında gəlib. O, yüngül atletika üzrə 100 metr məsafəyə qaçışda T13 kateqoriyasında iştirak edib. Bu yarışda Lamiyə həm sürəti, həm də texnikası ilə heyranlıq yaratdı. Finala yüksəldikdən sonra o, 100 metr məsafəni 12,45 saniyədə qət edərək gümüş medal qazanıb. Bu, Azərbaycanın Paralimpiya hərəkatı tarixində önəmli bir hadisə idi və Lamiyə Vəliyeva öz ölkəsinə böyük fəxr yaşadıb.

O, daha sonra 400 metr məsafəyə qaçışda da iştirak edərək qızıl medal qazanıb. Bu qələbə onun çempionluq səviyyəsini bir daha sübut edib. 400 metr yarışında göstərdiyi performans, onun dünya səviyyəsində nə qədər böyük bir idmançı olduğunu bir daha təsdiqləyib.

Lamiyə Vəliyevanın "Paris 2024" Paralimpiya Oyunlarındakı uğurları

Lamiyə Vəliyeva 2023-cü ildə Parisdə keçirilən Dünya Para Atletika Çempionatında 400 metr məsafəyə qaçışda dünya rekordu qıraraq, bu kateqoriyada rəqibsiz olduğunu sübut edib. Bu nailiyyət, onun Paris 2024 Paralimpiya Oyunlarında da qələbə qazanmağa ən güclü namizəd olduğunu təsdiqləyib.

"Paris 2024" Lamiyə üçün təkcə idman nailiyyətləri baxımından deyil, həm də Azərbaycanı qlobal səviyyədə təmsil etmək baxımından əhəmiyyətli idi. O, həm şəxsi uğurlarını təkrarlamaq, həm də Azərbaycan Paralimpiya hərəkatını beynəlxalq səviyyədə daha da möhkəmləndirmək üçün çalışırdı.

Nəticədə Lamiyə Vəliyeva Parisdə də finiş xəttini birinci keçib və fəxri kürsünün ən yüksək pilləsinə qalxıb. O, həm də 11.76 saniyəlik nəticə ilə ən yaxşı göstəriciyə malik olan Leilia Adjametovanı qabaqlayaraq yeni dünya rekordu müyyənləşdirib.