Çoxfunksiyalı SPOT ROBOTU satışda - FOTO - VİDEO

Robototexnika sahəsində fəaliyyət göstərən "Boston Dynamics" şirkəti özünün məşhur Spot adlı robotunun kommersiya məqsədilə satışa çıxarıldığını açıqlayıb.

Lent.az "technote"a istinadla xəbər verir ki, şirkət sözügedən robotu ilk alıcılara göndərib.

"Xüsusi ötürücülərdən, proqram təminatından və digər əlavələrdən istifadə edərək Spot robotunu ayarlamaq mümkündü. İlk müştərilər artıq Spotu tikinti sahələrinin monitorinqində, qaz, neft və energetik qurğulardakı uzaqdan idarəetmənin reallaşdırılmasında və ictimai təhlükəsizlik sahəsində test edir. Spot irimiqyaslı istehsalata keçirilib və o artıq ilk müştərilərə çatdırılıb” - deyə şirkətdən bildirilib.

Robotun əsas özəlliklərindən biri də mühitdə tam sərbəst hərəkət etmək və ekstremal vəziyyətlərdə tarazlığı qorumaqdır. Hətta yıxılandan sonra da o, heç kimin köməyi olmadan 4 ayağı üzərinə qalxa bilir. Robot həm avtonom rejimdə həm də operatorun köməyi ilə hərəkət edə bilir. İkinci halda operator idarəetmə pultundan istifadə edir. Həmin pult isə öz növbəsində böyük sensorlu ekrandan və idarəetmə stiklərindn ibarətdir.

Bir sözlə, idarəetmə pultu gamerlərin istifadə etdikləri gamepadları xatırladır. Pultun ekranında robotun gövdəsinin bir çox yerində yerləşdirilmiş kameralardan görüntü əks olunur. Operator Spot-u həm idarəetmə stikləri vasitəsilə idarə edə, həm də sensorlu ekranda müəyyən yeri təyin etməklə robota hərəkət əmrini verə bilər.