Tramp Dorian qasırğasına görə Florida ştatında fövqəladə vəziyyət elan etdi

ABŞ-ın Milli Qasırğa Mərkəzi şənbə günü bildirib ki, bu gün 4-cü kateqoriyalı Dorian qasırğası güclənə bilər.

Sinoptiklər bildirib ki, Baham adalarının şimal-qərbində “həyat üçün təhlükəli olan” qasırğa nəticəsində suyun səviyyəsi normal səviyyədən üç-beş metrə daha yüksəyə qalxa bilər.

APA “americanınsesi”nə istinadla xəbər verir ki, rəsmi bildirişə görə, sahil yaxınlığında böyük, dağıdıcı küləklər müşahidə olunacaq.

Qasırğa Baham adaları və ABŞ-ın Florida ştatına doğru irəliləyir.

Baham höküməti adanın şımalında qasırğa olacağı ilə bağlı xəbərdarlıq edib, ABŞ prezidenti Donald Tramp isə Florida ştatında fövqəladə vəziyyət elan edib.

Milli Qasırğa Mərkəzi bildirib ki, Dorian yavaş, yəni saatda 17 kilometr sürətlə irəlilədiyi üçün uzun müddət yağışlara, küləklərə və fırtınalara səbəb ola bilər, bu isə həyat üçün təhüləki daşqınlarla nəticələnə bilər.