Bu şəxslərə məktəbli formaları pulsuz paylanacaq - RƏSMİ

“2017-ci ildən məktəbli formalarının qiymətləri dəyişməyib”.

Bu sözləri Lent.az-a açıqlamasında Bakı Tikiş Evinin (BTE) satış şöbəsinin rəisi Etibar Əzimov deyib. O bildirib ki, 1-6-cı siniflərin məktəbli formasının qiyməti 40 manat, 7-11-ci sinif şagirdləri üçün 46 manatdır:

“Bu dəstə pencək, şalvar və yaxud pencək, ətək daxildir. Hal-hazırda tikiş prosesi gedir və formaları hər il təxminən 20-25 min civarında tikirik. Biz öz mağazalarımızda olan bütün mallara cavabdehik və onların hamısında qiymətlər eynidir. Digər mağazalarda olan qiymətlərin isə bizə aidiyyəti yoxdur”.

E.Əzimov qeyd edib ki, Təhsil Nazirliyinin sifariş etdiyi 10 000 məktəbli formasının da hazırlanmasına davam edilir:

“Sentyabrın 15-dək onların sifarişlərini çatdıracağıq. Nazirlik hər il bizdən formalar alır və bu il də əvvəlki illərdə olduğu kimi aldığı formaları internatlara və kimsəsizlərə paylayacaq”.

Qeyd edək ki, Bakı Tikiş Evi artıq 10 ildir vahid məktəbli formasının istehsalını və satışını həyata keçirir. “BTE” loqosu ilə məktəbli geyimləri dörd modeldə hazırlanır. Gigiyenik və uyğunluq sertifikatı olan formaların parçası Türkiyədən gətirilir və bu geyimlər uşaqların sağlamlığına heç bir əks təsir göstərmir. Məktəbli formalarının keyfiyyətinə bir il zəmanət verilir.

Həmçinin əhalinin rahat alış-verişini təmin etmək üçün Sumqayıt, Mərdəkan, Qaradağ, Buzovna və Sahil qəsəbələrində, habelə metronun müxtəlif stansiyalarının yaxınlığında BTE-nin satış mərkəzləri fəaliyyət göstərir. Ümumilikdə isə BTE-nin 9 filialı var. Satış mərkəzləri həftənin yeddi günü fasiləsiz fəaliyyət göstərir. Eyni zamanda, ilboyu BTE-nin bütün satış mərkəzlərindən məktəbli formasını və aksesuarlarını almaq olar.