Ağac kəsdiyinə görə cəzalandı

Tovuz rayonunda ağac kəsilməsi ilə bağlı daxil olan şikayəti Ekologiya və Təbii Sərvətlər Nazirliyinin yerli qurumunun əməkdaşları araşdırıb.

Lent.az -a nazirlikdən verilən məlumata görə, araşdırma zamanı Tovuz şəhəri, İstiqlal küçəsi 3 ünvanında 1 ədəd söyüd ağacının şəhər ərazisində aparılan abadlaşdırma və təmizlik işləri zamanı Tovuz şəhər Mənzil Kommunal Təsərrüfatı Birliyinin işçisi Fazil Həsənovun icazəsiz kəsdiyi məlum olub.

Faktla bağlı F.Həsənov barəsində protokol tərtib edilib və o 2360 manat cərimə edilib. Eyni zamanda, kəsilən ağacın yerinə yeni ağacların əkilməsi üçün Tovuz şəhər Mənzil Kommunal Təsərrüfatı Birliyinə icrası məcburi olan “məcburi göstəriş” verilib. Ağacların əkilməsinə və onlara qulluq göstərilməsinə nəzarət olunacaq.