1425
21:48
06 May 2019

YSK nəticələri ləğv etdi - İstanbulda seçkilər yenidən keçiriləcək

Bu gün Türkiyənin Ali Seçki Qurumu (YSK) hakim Ədalət və İnkişaf Partiyasının (AKP) martın 31-də İstanbulda keçirilmiş bələdiyyə seçkilərinin nəticələrinin ləğvi ilə bağlı müraciətinə baxıb.

ONA -nın "Anadolu" agentliyinə istinadən verdiyi xəbərə görə, YSK-nın bu gün keçirilən iclasında seçkilərin təkrar keçirilməsinəqərar verilib. Qərar komissiyanın 11 üzvündən yeddisinin razılığı ilə verilib. Digər 4 nümayəndə isə buna qarşı çıxıb.

Bildirilir ki, təkrar seçkilər iyun ayının 23-də keçiriləcək. YSK-nın açıqlamasına görə, CHP-nin namizədi Əkram İmamoğluna verilmiş mandat geri alınacaq. Bu qərardan sonra CHP rəhbərliyi bölgələrdəki bütün təşkilat rəhbərlərinin iştirakı ilə təcili toplanış çağırıb.

Qeyd edək ki, martın 31-də Türkiyədə bələdiyyə seçkisi keçirilib. İstanbul Böyük Şəhər Bələdiyyəsi sədrliyi uğrunda ən çox səsi Cümhuriyyət Xalq Partiyasının (CHP) namizədi Əkrəm İmamoğlu və hakim Ədalət və İnkişaf Partiyasının (AKP) namizədi Binəli Yıldırım toplayıb. Ali Seçki Qurumu (YSK) Əkrəm İmamoğlunun 26 min səs fərqi ilə qalib gəldiyini açıqladıqdan sonra AKP seçkinin nəticələrinə etiraz edib və bir çox rayonda səslər yenidən sayılıb. Aprelin 17-də səslərin təkrar sayılması prosesi başa çatıb və səs fərqi 12 min nəfərədək düşüb.

AKP seçkinin nəticəsinin ləğv ilə bağlı fövqəladə hüququndan istifadə edəcəyini açıqlayıb. Daha sonra İstanbulda keçirilmiş bələdiyyə seçkilərinin nəticələrinin ləğvi və yenidən keçirilməsi tələbi ilə bağlı YSK-ya müraciət edib.

YSK aprelin 17-də İstanbul bələdiyyə sədri mandatını Əkrəm İmamoğluna təqdim edib.

Xatırladaq ki, paytaxt Ankara və ölkənin üçüncü ən böyük şəhəri olan İzmirdə də CHP-nin namizədləri qalib gəlib. Mansur Yavaş Ankara, Mustafa Tunç Soyer İzmirin bələdiyyə sədrləri olub.