iPhone üçün yeni nəsil aksesuarlar arasında ən çox diqqət çəkən xüsusiyyətlərdən biri “MagSafe” texnologiyasıdır. Bəzi iPhone örtüklərinin arxa hissəsində gördüyünüz böyük dairəvi işarə sadəcə dizayn elementi deyil, bu, MagSafe maqnit sisteminin göstəricisidir. Bu texnologiya ilk dəfə iPhone 12 modelində təqdim edilib və o vaxtdan bəri demək olar ki, bütün Apple modellərində (SE və iPhone 16e seriyaları istisna olmaqla) istifadə olunur.
Lent.az xarici mediaya istinadla xəbər verir ki, “MagSafe” iPhone korpusuna və onunla uyğun gələn aksesuarların içinə yerləşdirilmiş maqnit sistemidir. Bununla da, telefona maqnitlə cüzdan, xarici batareya, avtomobil tutacağı, masa dayağı və digər cihazlar rahatlıqla birləşdirilə bilir.
Bundan əlavə, MagSafe simsiz enerji yükləməni xeyli sadələşdirir, artıq enerji ötürmə bobinlərinin yerləşməsini “tutmaq” lazım deyil, maqnitlər cihazı avtomatik olaraq düzgün mövqeyə gətirir.
Dairəvi işarə və altındakı xətt nə üçündür?
iPhone örtüklərindəki dairəvi nişan içərisində yerləşən maqnit halqanın yerini göstərir. Məhz bu halqa MagSafe aksesuarları ilə uyğunluğu təmin edir və simsiz enerji ötürülməsini itkisiz şəkildə həyata keçirməyə kömək edir.
Dairənin altındakı nazik şaquli xətt isə aksesuarların düzgün istiqamətdə yerləşməsinə yardım edir, məsələn, enerji bankı və ya avtomobil tutacağının düz şəkildə oturması üçün.
MagSafe olmayan örtüklərdə vəziyyət necə olur?
Əgər istifadə etdiyiniz örtük MagSafe dəstəyinə malik deyilsə, bu zaman həm simsiz enerji ötürülməsi zəifləyə, həm də maqnitlə birləşən aksesuarlar sabit dayanmayaraq düşə bilər. Buna görə də iPhone istifadəçilərinə “MagSafe compatible” (MagSafe ilə uyğun) qeydli örtüklər seçmək tövsiyə olunur.
Əgər bəyəndiyiniz örtük bu dəstəyi təklif etmirsə, alternativ olaraq xaricdən yapışdırılan MagSafe maqnit halqaları əldə etmək mümkündür. Onlar telefonun arxa hissəsinə bərkidilir və eyni funksiyanı yerinə yetirir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
