Bəzən təmir gözəllik naminə deyil, divar qüsurları ilə mübarizə üçün aparılır. Kiçik bir nahamarlıq belə ümumi interyer təsirini poza bilər. Amma dizaynerlərə görə, düzgün seçilmiş oboy naxışı bu problemi vizual olaraq gizlədə bilər.
Lent.az bu naxışları təqdim edir:
İnsan gözü və “vizual illüziya” effekti
İnsan gözü naxış və teksturaları fərqli qavrayır. Məhz buna görə bəzi oboylar divarları daha hamar göstərir, digərləri isə əksinə qüsurları qabardır.
Kiçik naxışlar “vizual səs-küy” effekti
Dizaynerlərin fikrincə, xırda printlər (kiçik naxışlar) məsələn, çiçək motivləri, xırda nöqtələr və ya incə geometrik xətlər divarlarda “vizual səs-küy” yaradır. Bu, baxışları nizamlayır və nə kölgə, nə də nahamarlıq gözə batmır. Belə oboylar divara tekstura və dərinlik effekti verir, nəticədə səth daha hamar görünür.
Böyük naxışlar - qüsurları vurğulayır
Əksinə, iri rəsmlər və ya kontrastlı ornamentlər divarların geometriyasını ön plana çıxarır. Əgər divar düz deyilsə, böyük print “qırılır” və əyri görünür, bu da bütün qüsurları daha da aydınlaşdırır. Ona görə böyük printlər yalnız mükəmməl hamar divarlarda gözəl görünür.
Rəng seçimi: açıq tonlar və kiçik naxışlar ideal tandem
Açıq tonlar işığı əks etdirir, otağı daha işıqlı və geniş göstərir. Onları kiçik naxışlarla birləşdirmək həm maskalama effektini artırır, həm də interyerə yüngüllük qatır. Qaranlıq oboylar və iri printlər isə əksinə, qüsurları qabarda bilər.
Kəskin kontrastlardan uzaq durun
Dizaynerlər kəskin rəng keçidlərindən və ziddiyyətli naxışlardan qaçmağı məsləhət görürlər. Çünki belə kontrastlar baxışı cəmləyir və divardakı hər nöqtəni daha nəzərəçarpan edir. Əvəzində yumşaq, axıcı rəng keçidləri daha sakit və harmonik görüntü yaradır.
Şaquli zolaqlar ehtiyatla istifadə edin
Şaquli zolaqlı oboylar otağı vizual olaraq “uzada” bilər, amma divar düz deyilsə, zolaqlar əyilmiş kimi görünəcək. Bu halda effekti itirərsiniz, ona görə belə oboylardan yalnız hamar səthlərdə istifadə etmək məsləhətdir. Əgər divarlarınızda qüsurlar varsa, kiçik, açıq tonlu və sakit naxışlı oboylar seçin. Belə seçim sizə həm daha səliqəli görünüş, həm də divarları əlavə hamarlamadan qənaət imkanı verəcək bu isə təmir büdcəsinə də xeyirdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
