Van Dammın Qəbələdəki heykəli götürüldü - YENİLƏNİB

"Van Dammın Qəbələdəki heykəli yolda təmir-tikinti işləri başa çatandan sonra yerinə qaytarılacaq".

Bunu Lent.az-a açıqlamasında Van Dammın heykəlinin yerləşdiyi istirahət mərkəzinin rəhbəri Şakir Eminbəyli deyib.

Onun sözlərinə görə, heykəl təxminən bir ay əvvəl götürülüb:

"Hazırda həmin yolda təmir-tikinti işləri aparılır. Heykəlin batmaması və zədələnməməsi üçün bir onu götürdük. Yolda təmir başa çatandan sonra heykəli təkrar yerinə qaytaracağıq".

***

saat 10:30

Dünyaşöhrətli amerikalı aktyor Jan Klod Van Dammın Qəbələ rayonunun Vəndam kəndindəki heykəli götürülüb.

Lent.az xəbər verir ki, bu barədə məlumatı “İqtisadiyyat.az”a kəndin bələdiyyə sədri Asif Həşimov təsdiqləyib.

Onun sözlərinə görə, heykəlin götürülməsi yol çəkilişi ilə əlaqədardır: “Respublika əhəmiyyətli yolun tikintisi ilə əlaqədar olaraq, heykəl oradan götürülüb. Çünki abidə yolun qoruma zolağında yerləşirdi. Buna görə də həmin ərazidən götürülüb və mühafizə olunan yerdə qoyulacaq”.

Qeyd edək ki, Vəndam kəndində məşhur aktyor Jan Klod Van Dammın abidəsi bir neçə il bundan əvvəl ucaldılıb. Abidənin müəllifi məşhur heykəltaraş Azad Əliyevdir. Hollivud ulduzu heykəlinin qoyulmasına görə 2019-cu ildə özünün feysbuk səhifəsi vasitəsilə Azərbaycana təşəkkür edib.

Xatırladaq ki, Jan-Klod Van Dammın oğlu Kristofer Van Barenberq 2021-ci ildə azərbaycanlı Suada Hacızadə ilə ailə həyatı qurub. Cütlüyün izdivacı Azərbaycan ictimaiyyətində böyük marağa səbəb olub.