Azərbaycanda 1372600 nəfər muzdlu işçi var

Lent.az-ın Dövlət Statistika Komitəsinin saytına istinadən xəbərinə görə, onlardan 859 min 200 nəfəri iqtisadiyyatın dövlət bölməsində, 513 min 4 yüz nəfəri isə qeyri-dövlət bölməsində fəaliyyət göstərib.

Muzdla işləyənlərin 25,2 faizi təhsildə, 19,6 faizi ticarət, nəqliyyat vasitələrinin təmiri sahəsində, 12,1 faizi sənayedə, 10,0 faizi əhaliyə səhiyyə və sosial xidmətlərin göstərilməsində, 6,0 faizi tikintidə, 4,8 faizi nəqliyyat və anbar təsərrüfatında, 4,0 faizi dövlət idarəetməsi və müdafiə, icbari sosial təminat sahəsində, 3,3 faizi peşə, elmi və texniki fəaliyyəti sahəsində, 1,8 faizi informasiya və rabitə sahəsində, 1,6 faizi inzibati və yardımçı xidmətlərin göstərilməsi sahəsində və 11,6 faizi iqtisadiyyatın digər sahələrində məşğul olublar.

Muzdlu əsaslarla çalışan işçilərin 21 faizi məhsul istehsalı sahələrində cəmlənib.

İyun ayında ölkə iqtisadiyyatında muzdla çalışan işçilərin orta aylıq əmək haqqı əvvəlki ilin müvafiq dövrünə nisbətən 7,8 faiz artaraq 358,9 manat təşkil edib. Digər fəaliyyət növləri ilə müqayisədə mədənçıxarma sənayesində, maliyyə və sığorta fəaliyyətində, informasiya və rabitədə, peşə, elmi və texniki fəaliyyət sahəsində, inzibati və yardımçı xidmətlərin göstərilməsi sahəsində, tikintidə orta aylıq əmək haqqı daha yüksək olub.