Bakıda it sərgisi

Bu gün Azərbaycan paytaxtında bacarıqlı itlərin sərgi-yarışı keçirilib.

APA-nın məlumatına görə, “Luna Park”da təşkil olunan sərgidə 100-ə yaxın müxtəlif cinsli it iştirak edib. Sərgini təşkil edən Kinoloqlar İctimai Birliyi 2002-ci ildən belə sərgilər keçirir. Birliyin sədri Zaur Ağabəyli APA-ya bildirib ki, gələcəkdə analoji sərgilərin Sumqayıt və Gəncədə də keçirilməsi nəzərdə tutulur. Bunun üçün ilk növbədə bu şəhərlərdə olan itsevərlərin sayını və məlumatlarını toplamağa ehtiyac var.

Z.Ağabəylinin sözlərinə görə, sərgidə iştirak edən itlər üçün xüsusi yerlər müəyyənləşdirilib. Hər bir it cinsinin özünə aid yaşı və cinsindən (erkək və ya dişi) asılı olaraq titullar veriləcək. Sonda isə sərginin ən yaxşı iti seçiləcək və o, sərginin ümumi qalibi olacaq. Qaliblərin müəyyənləşdirilməsi üçün meyarlar müxtəlifdir: “Bu gözəllik sərgisidir və tədbirin meyarlarında əsasən itlərin görünüşü, bacarıqları qiymətləndirilir. Mükafatlar isə simvolik olaraq suvenirlər, kuboklar və titullar olacaq. Bizim sərgilərdə çox qiymətlə mükafatlar olmur. Amma titullar verilir, hər titula görə it sahibi fəxr edə və öz reytinqini artıra bilər”.

İtlərin qiymətləndirilməsi bu sahə üzrə mütəxəssislər, beynəlxalq dərəcəli hakimlər tərəfindən həyata keçiriləcək.

Sərgiyə Rusiyadan da 20-yə yaxın iştirakçı qatılıb. Ötən illərdə isə Ukrayna, Çexiya və Latviyadan da sərgi iştirakçıları olub.

Qeyd edək ki, sərgi günün sonuna kimi davam edəcək və sonda qaliblərin mükafatlandırılması mərasimi keçiriləcək.