Tramp komandasının Ukraynadakı müharibə üçün sülh planı – Əsas MƏQAMLAR

Amerikanın CNN teleradio şirkəti Donald Trampın Rusiya-Ukrayna müharibəsi üzrə xüsusi nümayəndəsi Kit Kelloqun hazırladığı sülh planının əsas müddəalarını dərc edib.

Lent.az-ın xəbərinə görə, hələ aprel ayında təklif edilən bu plan sanksiyaların tamamilə ləğvi də daxil olmaqla, münaqişənin dayandırılması müqabilində Rusiyaya əhəmiyyətli güzəştlər nəzərdə tutur.

Planın əsas müddəaları

Kelloq, atəşkəs şərti ilə Rusiyaya qarşı sanksiyaları mərhələli şəkildə yumşaltmağı, hazırkı cəbhə xəttini dondurmağı və Ukraynada hərbisizləşdirilmiş zona yaratmağı təklif edir. Sülh sazişi imzalansa, sanksiyalar tamamilə aradan qaldırılacaq. Ukraynanı bərpa etmək üçün Rusiyanın enerji resurslarının ixracına rüsumların tətbiqi təklif edilir.

İşğal olunmuş ərazilər və diplomatiya

Plan Rusiyanın zəbt etdiyi ərazilərin dərhal geri qaytarılmasını nəzərdə tutmur. Kelloqun fikrincə, onların taleyi yalnız diplomatiya yolu ilə həll edilməlidir. Ukraynadan tələb olunur ki, işğal olunmuş torpaqların qaytarılması yalnız gələcəkdə Rusiya rəhbərliyində potensial dəyişikliklərdən, o cümlədən Vladimir Putinin gedişindən sonra mümkün olacaq.

NATO-ya üzvlük və təhlükəsizlik təminatları

Kelloqun əsas tövsiyələrindən biri Ukraynanın NATO-ya daxil olmasını qeyri-müəyyən müddətə təxirə salmaqdır.
Bunun əvəzinə, təsdiqlənə bilən təhlükəsizlik zəmanəti ilə dəstəklənən "hərtərəfli sülh müqaviləsi" nin hazırlanmasını təklif edir.

ABŞ-ın yardım şərti

Gələcək Amerika dəstəyi, ehtimal ki, kreditlər şəklində Kiyev və Moskva arasında danışıqların irəliləyişindən asılı olacaq. ABŞ həm mümkün sülh razılaşmasından əvvəl, həm də sonra Rusiyanın hücumlarının qarşısını almaq üçün Ukraynanı silahlandırmaqda davam etməyə hazırdır.

Kelloqun arqumentləri

Planın müəllifinin fikrincə, ABŞ üçün prioritet atəşkəsə nail olmaq və münaqişəni danışıqlar yolu ilə həll etmək olmalıdır. Kelloq vurğulayır ki, müharibənin uzadılması ABŞ-ın silah ehtiyatlarını tükəndirir və ölkəni Tayvanla bağlı Çinlə potensial münaqişəyə qarşı həssas edir. O hesab edir ki, Amerika başqa bir silahlı münaqişəyə dərindən qarışmaqdan çəkinməlidir.

Bu plan mübahisəlidir, çünki o, Rusiyaya əhəmiyyətli güzəştləri nəzərdə tutur və Ukraynanın hazırkı sərhədləri daxilində tam suverenliyini nəzərə almır.