Hindistan mətbəxinin məşhur şirniyyatı “Jalebi”

Dünya mətbəxindən fərqli yeməkləri sevənlər üçün yaxşı reseptimiz var. Bu dəfə Hindistan mətbəxindən sizə dadlı bir şirniyyat resepti hazırladıq.

Lent.az sizə “Jalebi”nin hazırlanma qaydasını təqdim edir:

Bu şirniyyatı hazırlamaq üçün bizə lazım olan ərzaqlar:

1.5 stəkan ələnmiş un

1.5 çay qqaşığı manna

1/4 çay qaşığı soda

1 xörək qaşığı qatıq

Su (xəmir üçün 1 stəkan; şərbət üçün 1 stəkan)

Duru yağ (qızartmaq üçün)

1.5 stəkan şəkər tozu

1 çay qaşığı təzə sıxılmış limon suyu

İndi isə hazırlanma qaydası:

Dərin bir qaba ələnmiş unu, mannını, sodanı, qatığı və isti suyu əlavə edib yaxşıca qarışıdırın. Xəmirin üstünü örtüb, 2 saat isti yerdə saxlayın.

Xəmir dincələnə qədər şərbəti hazırlayaq. Bir qazana suyu, sıxılmış limon suyunu və şəkər tozunu əlavə edin. Şərbəti qaynayana qədər sobanın üstündə saxlayın. Daha sonra soyuması üçün kənara qoyun.

“Jalebi” spiral formasında hazırlanır. Bunun üçün xəmirdən bir parça ayırıb nazik, uzun formalar hazırlayın. Sonra bu formaları spiral formasına salın. Tavaya duru yağ əlavə edin. Yağ elə olsun ki, “Jalebi”lər tavanın dibinə düşməsin, yağın üstündə qızarsın. “Jalebi”lərin hər tərəfini qızılı rəng alana qədər qızardın. Bişən “Jalebi”ləri salfetkanın üzərinə qoyun ki, əlavə yağını özünə çəksin. Hazır olan “Jalebi”ləri şərbət salıb, süfrəyə təqdim edə bilərsiniz.

Nuş olsun!