Araz Abdullayev “Neftçi”nin əsas heyətinə qaytarıldı

Azərbaycan çempionatının 8-ci turunda “Sumqayıt”la oyunda əvəzləndiyi üçün etiraz edən, daha doğrusu, baş məşqçi Arif Əsədovun əlini sıxmayan "Neftçi"nin yarımmüdafiəçisi Araz Abdullayev bağışlanıb. Gənc yarımmüdafiəçini əvəzedici heyətə göndərməklə cəzalandıran rəhbərlik onu əfv edib. Belə ki, “İnter”lə oyunda iştirak edə bilməyən Araz yenidən “Neftçi”nin əsas heyətinə qaytarılıb. Bu məlumatı Lent.az-a açıqlamasında “flaqman”ın baş məşqçisi Arif Əsədov da təsdiqləyib: “Bəli, Arazı əsas komandaya qaytardıq. Onun komandaya lazımlı futbolçu olduğunu nəzərə alıb, bu dəfə güzəştə getdik. Özü də səhv etdiyini anladı və üzr istədi”.