Cüdoçularımız Avropa çempionatında iki qızıl, bir gümüş medal qazandı -YENİLƏNİB

Estoniyanın Tallin şəhərində cüdo üzrə gənclər arasında Avropa çempionatı davam edir.

Apasport.az xəbər verir ki, millimiz aktivinə daha iki medal yazdırıb.

60 kq çəki dərəcəsində Nizami İmranov mübarizəyə 1/8 finaldan başlayıb. O, italiyalı Françesko Sampinonu məğlub edərək növbəti mərhələyə yüksəlib.

Nizami 1/4 finalda serbiyalı Marko Yorgiçdən də üstün olub. Nizaminin yarımfinalda fransalı rəqibi Zahariye Dijola qalib gəlib. İmranov həlledici qarşılaşmada Nazar Viskova (Ukrayna) uduzaraq gümüş medalla kifayətlənib.

57 kq çəkidə isə Fidan Əlizadə ilk görüşdə lixtenşteynli Lei Vissanı məğlub edib. O, 1/8 finalda sloveniyalı Yevgeniya Qaiçdən üstün olub. Növbəti mərhələdə britaniyalı Kloe Linkdən də güclü olan Fidan yarımfinala yüksəlib.

İdmançımız rumıniyalı Vanessa Toleayanı da keçərək, adını finala yazdırıb.

Cüdoçumuz gürcüstanlı Nino Loladzeni məğlub edərək qızıl medal qazanıb.

***

18:08

Azərbaycan təmsilçisi Könül Əliyeva (52 kq) Estoniyanın paytaxtı Tallində keçirilən cüdo üzrə Avropa çempionatının qalibi olub.

Apasport.az xəbər verir ki, Könül Əliyeva bütün rəqiblərinə qalib gələrək fəxri kürsünün ən yüksək pilləsinə qalxıb.

Qeyd edək ki, o, turnirdə Azərbaycanın aktivinə ilk qızıl medalı yazdırıb.