Türkiyədə qayda pozan Azərbaycana məxsus avtomobilin kimə aid olduğu məlum olub.
Lent.az-ın əldə etdiyi xəbərə görə, qayda pozduğu iddia edilən Azərbaycana məxsus, 10 EE 111 dövlət nömrə nişanı BMW markalı avtomobilə aiddir və həmin avtomobil də Həsənov Eldəniz Samir oğlunun adınadır.
Apardığımız araşdırma zamanı o da məlum olub ki, sözügedən avtomobil 3-4 adama etibarnamə ilə verilib.
Sonuncu etibarnamə isə Vüqar Hüseyn oğlu Yunusovun adına rəsmiləşdirilib.
Qeyd edək ki, Azərbaycana məxsus internet resurslarında 10 EE 111 dövlət nömrə nişanı "Range Rover" markalı avtomobilin üzərində nümayiş etdirilir.
***
saat 11:03
Türkiyənin İsparta şəhərinin Gökçehüyük kəndində yaşayan Əminə Tüzünə traktoru ilə İstanbulda keçən ilin oktyabr-noyabr aylarında 6 dəfə körpüdən, 3 dəfə magistral yoldan ödəniş etmədən keçdiyi üçün göndərilən 477 lirə ( təxminən 55 manat ) cəriməsi ləğv edilib.
Lent.az Türkiyə KİV-ə istinadən xəbər verir ki, buna səbəb cərimənin səhvən yazılması olub.
Türkiyənin Nəqliyyat və İnfrastruktur Nazirliyi 64 yaşlı Əminə Tüzünün şikayətindən sonra araşdırmalara başlayıb. Kamera görüntülərindən müəyyən edilib ki, həmin yoldan 10 EE 111 Azərbaycan dövlət nömrə nişanlı avtomobil istifadə edib.
Nazirliyin açıqlamasında bildirilir ki, Azərbaycan və Türkiyə nömrəli nəqliyyat vasitələrinin eyni nömrə nişanından istifadə etməsi nəticəsində bu problem yaranıb.
Məsələ nazirlik rəsmilərinə çatdırıldıqdan sonra araşdırmalara başlanılıb və səhv aradan qaldırılıb.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
