Qamət Süleymanovun 50 minlik iddiası üzrə növbəti məhkəmə prosesi

“Azadlıq” radiosu təkzib verməyə razı deyil

Bakı Apellyasiya Məhkəməsində “Nərimanov rayon dindarları” Dini İcmasının rəhbəri, “Əbu Bəkr” məscidinin imamı Qamət Süleymanovun “Azadlıq” radiosunun redaksiyasına qarşı qaldırdığı iddia üzrə növbəti məhkəmə prosesi keçirilib. Bu barədə Lent.az-a Q.Süleymanovun hüquqi nümayəndəsi Rəşad Məmmədov məlumat verib.

O, Aygün Abdullayevanın sədrliyilə keçirilən prosesdə tərəflərin dinlənildiyini bildirib.

Q.Süleymanov “Azadlıq” radiosunun internet-saytında getmiş “Kimdir xəvariclər?” yazısının ona mənəvi ziyan vurduğunu iddia edərək, Yasamal rayon Məhkəməsinə müraciət edib. Belə ki, Q.Süleymanov həmin yazıda yer almış bir neçə məqamın “Əbu Bəkr” məscidinin maraqlarına toxunduğu qənaətindədir.

Q.Süleymanov radionun saytında təkzib məqaləsinin çap olunmasını, həmçinin 50 min manat ödənilməsini istəyib. Həmin məbləğ məscid üçün tələb olunmur. İddiaçı tərəf qarşı tərəfdən 50 min manat tutularaq uşaq bağçalarından birinə köçürülməsini istəyir.

Q.Süleymanovu məhkəmədə təmsil edən nümayəndə hüquqi xidmətlərə görə çəkilən xərclərin də “Azadlıq” radiosu tərəfindən ödənilməsini istəyir.

Yasamal rayon Məhkəməsi Q.Sülemanovun iddiasını qismən, təkzib verilməklə bağlı olan hissəsini təmin edib. “Azadlıq” radiosu məhkəmə qərarından apellyasiya şikayəti verib.

Proses mayın 21-də davam etdiriləcək.

Pərvin ABBASOV