Məhkum Müalicə Müəssisəsində intihar edib

Azərbaycanda narkotik qaçaqmalçılığında təqsirləndirilərək həbs edilən şəxs özünü öldürüb.

Bu barədə APA-ya hüquq-mühafizə orqanlarından məlumat verilib.

Hadisə Ədliyyə Nazirliyi Penitensiar Xidmətin Müalicə Müəssisəsində qeydə alınıb. Narkotik vasitələrin qanunsuz dövriyyəsi ilə əlaqədar təqsirləndirilən şəxs qismində məsuliyyətə cəlb olunan, 1959-cu il təvəllüdlü Sədrəddin Xanqulu oğlu Seyfullayev özünü Müalicə Müəssisəsində asaraq intihar edib. Onun özünə qəsd etməsinin səbəbləri barədə hələlik məlumat yoxdur.

İşgəncələrə Qarşı Azərbaycan Komitəsinin sədri Elçin Behbudov da APA-ya açıqlamasında hadisə barədə məlumatlı olduğunu qeyd edib: “Bildiyimə görə, Sədrəddin Seyfullayev Ədliyyə Nazirliyinin Müalicə Müəssisəsində intihar edib. Lakin həmin şəxsin yaxınları hələlik bu barədə komitəyə müraciət etməyiblər. Buna baxmayaraq, intihar hadisəsi tərəfimizdən araşdırılacaq”.

Qeyd edək ki, S. Seyfullayev bu ilin yanvarın 13-də Milli Təhlükəsizlik Nazirliyi (MTN) və Dövlət Gömrük Komitəsi (DGK) tərəfindən həyata keçirilən əməliyyat tədbirləri nəticəsində zərərsizləşdirilən mütəşəkkil dəstənin üzvüdür. Həmin əməliyyat zamanı “İran - Azərbaycan - Rusiya” marşrutu üzrə qaçaqmalçılıq yolu ilə narkotiklərin daşınmasıyla məşğul olan, 1959-cu il təvəllüdlü Sədrəddin Seyfullayev və İran vətəndaşları - 1965-ci il təvəllüdlü Musəvi Bəğrabad Seyid Abbas Mir Tofiq oğlu, 1959-cu il təvəllüdlü Yusif Həviq Seyid Kərim Mir Rəhim oğlu saxlanılıblar. Qrup üzvləri İrandan Azərbaycana 31 kiloqram 500 qram narkotik vasitə gətirmələri məlum olub.