Cənubi Qafqazdakı münaqişələr Astanada müzakirə olunacaq

İyunun 24 və 25-də Astanada Avro Atlantik Əməkdaşlıq Şurasının (EAPC) Təhlükəsizlik Forumu keçiriləcək. Lent.az-ın bildirdiyinə görə, bu barədə NATO-nun mətbuat xidmətindən məlumat yayıb.

NATO-ya üzv və tərəfdaş ölkələrin nümayəndələrinin qatılacağı forumda NATO-nun baş katibi Yaap de Hoop Sxeffer də iştirak edəcək.

“Tədbirdə Əfqanıstanda sülhün təmin olunmasına beynəlxalq dəstək məsələləri, həmçinin İSAF qüvvələrinin təchizat marşrutları ilə bağlı geniş müzakirələrin aparılması gözlənilir. Forumun mövzularından biri də Cənubi Qafqazdakı münaqişələr və bunun Avro Atlantik məkanda təhlükəsizliyə təsirləridir”, - deyə NATO-dan bildirilib.

Forum çərçivəsində enerji təhlükəsizliyi, NATO-nun Elm Proqramı çərçivəsində Qafqaz və Mərkəzi Asiya regionunda görülən işlər, “Virtual İpək Yolu” sürətli internet magistralının genişləndirilməsi, Özbəkistanda başlanmış melanjın (raket yanacağı) ləğvi layihəsinin təqdimatı keçiriləcək. Forum çərçivəsində Elm Fondunun iclasında bir sıra ölkələrdən, o cümlədən Azərbaycandan alimlərin çıxışı gözlənilir.

Rəşad Süleymanov