Putin qiyam günü Kremldə belə işlədi - VİDEO

Jurnalist Pavel Zarubin iyunun 24-də, "Vaqner" özəl hərbi şirkətinin qiyam etdiyi gün Kremldə Rusiya prezidenti Vladimir Putinin görüntülərini nümayiş etdirib.

Lent.az xəbər verir ki, o, müvafiq videonu "Telegram" kanalında yayımlayıb.

Zarubin qeyd edib ki, prezident bütün gecəni güc strukturları ilə əlaqə saxlayıb. O əlavə edib ki, Kremldə iş “xüsusi rejimdə” aparılıb.

Videoda Putinin şənbə günü səhər saatlarında ruslara videomüraciət yazması anları da əks olunub.

Putinin videomüraciəti “Vaqner” özəl hərbi şirkətinin (PMC) rəhbəri Yevgeni Priqojinin Rusiya hərbçilərini şirkətin arxa düşərgələrinə hücum etməkdə günahlandıran hərəkətləri fonunda yayımlanıb. Priqojin döyüşçülərinin yolunu kəsən hər kəsi güc tətbiq etməklə və məhv etməklə hədələyib. Putin iğtişaşlara cavab olaraq sərt addımlar atılacağı barədə xəbərdarlıq edərək, konsolidasiya və məsuliyyətə çağırıb.

İyunun 24-ü axşam saatlarında Priqojin Belarus prezidenti Aleksandr Lukaşenko ilə danışıqlardan sonra onun hərbçilərinin geriyə dönüb səhra düşərgələrinə getdiyini elan edib. Kremlin sözçüsü Dmitri Peskovun sözlərinə görə, Priqojina qarşı cinayət işinə xitam veriləcək.