Bakıda avtoritetin güllələnməsi ANBAAN kameralara düşdü - VİDEO

Lent.az Bakıda kriminal avtoritetin öldürülmə anının görüntülərini əldə edib.  

Həmin görüntüləri təqdim edirik:

Qeyd edək ki, məlum cinayət işi 2019-cu ildə törədilib

CİNAYƏT İŞİ

İstintaq materiallarından məlum olur ki, öldürülən Mübariz Budaqlı ilə qətli törədən Taleh Cəlalovun arasında ədavət olub. Ədavət isə T. Cəlalovun həyat yoldaşının Tərtərin Seyidimli kəndində əxlaqsızlıq etməsi ilə bağlı yayılan iddialar səbəbindən meydana gəlib. 

İndi isə əvvəlcə hadisə barədə qısa məlumat verək. 2019-cu il iyunun 7-də keçirilmiş baxış protokoluna əsasən, Azadlıq prospekti, 185 ünvanında “Mercedes” markalı avtomobilin qabaq sərnişin oturacağında vətəndaş Mübariz Budaqlının meyiti aşkar edilib. 
 
Məlum olub ki, hadisə yerindən qaçmağa cəhd edən şəxs YPX əməkdaşları tərəfindən saxlanılıb və Binəqədi rayon Polis İdarəsinə təhvil verilib. Araşdırma zamanı, onun 1979-cu ildə Tərtər rayonunun Seydimli kəndində anadan olan Taleh Cəlalov olması müəyyən edilib. Həmin gün 1-ci Mədən qəsəbəsində yerləşən avtomobil təmiri sexində 16 kalibrli, lüləsi kəsilib qısaldılmış odlu silah götürülüb.
 
Qətl hadisəsi ilə əlaqədar Binəqədi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

Məhkəmə-tibb ekspertizasının rəyinə görə, Mübariz Budaqlıya atəş yaxın məsafədən açılıb. Onun ölümünə güllə nəticəsində beynin tam əzilib dağılması səbəb olub.
 
1984-cü il təvəllüdlü Vüsal Hüseynov və qardaşı 1983-cü il təvəllüdlü Səxavət Hüseynov iş üzrə təqsirləndirilən şəxs qismində istintaqa cəlb olunublar. Hadisədə iştirak edən Tərtər şəhər sakini 1985-ci il təvəllüdlü İmran Bəbirov oktyabrın 19-da həbs edilib.
 
İstintaqla müəyyən edilib ki, iyunun 7-i saat 18 radələrində Taleh Cəlalov tanışları ilə görüşmək üçün Binəqədi rayonu ərazisində yerləşən avtomobil təmiri sexinə yollanıb. Orada olarkən həyat yoldaşı Şərafət Cəlalova haqqında guya, kənddə əxlaqsızlıqla məşğul olması barədə 2011-ci ildə həqiqətə uyğun olmayan şayiələr yayan həmkəndliləri İlqar Mədətov və Ariz Qəhrəmanlı ilə həmfikir olan Mübariz Budaqlı da sexin qarşısına gəlib. Taleh Cəlalov Vüsal və Səxavət Hüseynov qardaşları ilə birlikdə Mübariz Budaqlını öldürmək qərarına gəlib. Səxavət Hüseynov özünə məxsus “BMW X5”, Vüsal Hüseynov isə «BMW 745» markalı avtomaşınlarla, ön sərnişin oturacağında Mübariz Budaqlının, arxa oturacaqda Fuad Mirzəzadənin oturduğu, Nazim Qədirovun idarə etdiyi “Mercedes” markalı avtomobili təqib etməyə başlayıb. Hüseynov qardaşları, nəqliyyat vasitələrinin intensiv hərəkət etdiyi yolda avtomobilləri yüksək sürətlə idarə edərək, davamlı şəkildə manevr qaydalarını pozmaqla, qarşıdan gələn maşınların hərəkət istiqamətinə çıxıblar. İctimai nəqliyyat vasitələrində olan sərnişinlərin, eləcə də piyadaların həyat və sağlamlıqları üçün təhlükə yaradıblar. Səxavət Hüseynov idarə etdiyi avtomobilin ön tərəfi ilə “Mercedes”i arxadan vurub, Vüsal Hüseynov isə öz avtomobili ilə həmin maşını sol tərəfdən sürtüb, qabaq sol qanad və yan güzgüsünü zədələyib. Eyni zamanda Taleh Cəlalov, niyyətlərini başa çatdırmaqdan ötrü pəncərəni açıb odlu silahdan bir dəfə atəş açıb. Nazim Qədirovun onlardan qaçmaq istədiyini görən Səxavət Hüseynov Binəqədi şossesindən Azadlıq prospektinə daxil olaraq “Mercedes”i arxadan 2-ci dəfə vurub. Azadlıq prospekti, 185-də tıxaca salaraq avtomobilin həmin ərazini tərk etmək imkanını məhdudlaşdırıb. Taleh Cəlalov əlində odlu silahla maşından düşərək, sağ tərəfdən Mübariz Budaqlının əyləşdiyi nəqliyyat vasitəsinə yaxınlaşıb və onun sifət nahiyəsinə atəş açıb. Bu hərəkəti ilə, o zərərçəkmişi qəsdən həyatdan məhrum edib.
 
İş üzrə dindirilmiş Taleh Cəlalov bildirib ki, 2007-2008-ci illərdə Ariz Qəhrəmanovla birlikdə Rusiyada taksi fəaliyyəti ilə məşğul olarkən ona borca 1000 manat pul verib. 2009-cu ildə borcunu istədikdə həmkəndlisi onun həyat yoldaşı Şərafət Cəlalovanın ünvanına nalayiq sözlər işlətməyə başlayıb, arvadının kənddə əxlaqsızlıqla məşğul olduğunu bildirib. Bu söz-söhbətlərlə bağlı 2011-ci ilin əvvəllərində Tərtər rayonunda, kafedə İlqar Mədətov, Ariz Qəhrəmanov və sonuncunun vasitəsi ilə tanıdığı Mübariz Budaqlı ilə görüşüb. Arvadının əxlaqsızlıqla məşğul olmasını sübut edə bilməyəcəkləri təqdirdə İlqarla Arizə onları vuracağını deyib. Hətta həmin görüş zamanı o, əl verib görüşmək istəyərkən Mübariz onun əlini sıxmayaraq “Mən yalnız kişilərin əlini sıxıram!” deyə cavab verib. Taleh həmin il sentyabrın 16-da rayonda olarkən, cəzalandırmaq məqsədilə bıçaqla İlqarı vurub. Bu əməlinə görə Cinayət Məcəlləsinin 221.3-cü maddəsi ilə təqsirli bilinib 2 il müddətinə islah işləri cəzasına məhkum olunub. 2013-cü il aprelin 8-də çayxanada olarkən üzərindəki dəmir parçası ilə Ariz Qəhrəmanovu da vuraraq, ona xəsarət yetirib. Həmin fakta görə də xuliqanlıq maddəsi ilə təqsirli bilinərək Tərtər rayon məhkəməsinin hökmü ilə 3 il 6 ay müddətinə azadlıqdan məhrum olunub. 2016-cı ildə azadlığa buraxılıb. İlqarı və Arizi vurduğundan ədavəti yalnız Mübarizlə qalıb.

O, istintaq zamanı ifadəsində bildirib ki, həmkəndlisi kimi tanıdığı və yaxın münasibəti olduğu Səxavət Hüseynovla rayonda ferma yaradıb və ailəsini dolandırıb. Səxavət Bakıda yaşayıb, avtoservis işlədib. Onun qardaşı Vüsal Hüseynovla da münasibəti yaxşı olub. Səxavətlə olan ortaq biznesləri ilə bağlı ay ərzində 4-5 dəfə Bakıya gəlib-gedib. 2019-cu il iyunun 7-də Hüseynov qardaşları ilə avtoservisin həyətindəki kafedə olarkən Mübariz Budaqlının bacısı oğlu kafeyə daxil olaraq Vüsalın kim olmasını soruşub. Vüsal “Mənəm!” deyə cavab verdikdə həmin şəxs onu bayıra çağırıb. Bir neçə dəqiqədən sonra Vüsal qışqırıb, Mübarizin gəlməsini bildirərək qaça-qaça yenidən servisin həyətinə daxil olub və özünə məxsus “BMW 745” markalı avtomobilə oturub. Bunu görən Taleh maşınının qabaq oturacağında, qohumu İmran isə arxa oturacağa əyləşiblər. Vüsal servisin həyətindən çıxaraq Mübarizin gəldiyi “Mercedes” markalı avtomobili təqib etməyə başlayıb. Binəqədi şossesi ilə şəhərin mərkəzinə doğru hərəkət ediblər. Vüsal maşınında saxladığı ov tüfəngini götürərək, ona bir qədər geriyə çəkilməsini deyib və sonra Mübarizin olduğu avtomaşına doğru atəş açıb. Silahı Talehə verib içərisinə yenidən güllə yerləşdirməsini tapşırıb. Vüsal Mübarizin əyləşdiyi maşını vuraraq, onu irəlidə olan tıxaca salıb. O, dərhal avtomobildən düşərək “Mercedes”ə sağ tərəfdən yaxınlaşıb və qapının sınmış şüşəsinin arasından Mübarizin sifətinə bir dəfə atəş açıb. Atəş açarkən sürücüsü sükan arxasından düşərək yolun əks tərəfinə doğru qaçıb. Həmin an Vüsal da sol tərəfdən maşına yaxınlaşıb. Səxavət onlara doğru qaçarkən Vüsal qardaşını saxlayaraq geriyə qayıtmasını deyib. O, da əlində silahla maşına oturub. Bir qədər irəlilədikdən sonra Səxavət yolun kənarında avtomobilini saxlayıb. O, maşından düşüb qaçmağa başlayıb, Səxavət isə avtomobilin yanında dayanıb. Qaçarkən yıxılaraq müxtəlif dərəcəli bədən xəsarətləri alıb, polis əməkdaşları təqib edərək, onu tutublar. 
 
“Mercedes”in sürücüsü, zərərçəkmiş Nazim Qədirov ifadəsində göstərib ki, 2019-cu il iyunun 7-dək nə Taleh Cəlalovu, nədə Vüsal Hüseynovu tanımayıb. Mübariz Budaqlı ilə birlikdə Bakı Dövlət Universitetində təhsil alıb. Universiteti bitirdikdən sonra da dostluq ediblər. Dəfələrlə onunla bir yerdə Tərtər rayonunun Seydimli kəndinə toy və yas məclislərində iştirak edib.
Yalnız Mübarizin sözlərindən bilib ki, onunla Vüsal arasında 5 il əvvəl narazılıq yaranıb. Mübariz Budaqlı hədə-qorxu ilə tələb etmə cinayətinə görə “İnterpol” vasitəsilə Gürcüstanda tutularaq Azərbaycana gətirilib və ibtidai istintaq üçün Baş Mütəşəkkil Cinayətkarlıqla Mübarizə İdarəsində aparılıb. 7 aydan sonra cinayət işinə xitam verilib və 2019-cu il aprelin 25-də dostu məhkəmə zalında həbsdən azad edilib. Demək olar ki, hər gün Mübarizin yanında olub.

İyunun 7-də Mehdiabad qəsəbəsinə dönən işıqfora çatdıqda Mübariz ona avtomobili kənara çəkib saxlamasını deyib və “WhatsApp”la kiməsə zəng edib. O, zəng zamanı həmin şəxsdən “BMW maşını və deyilənə görə, Binəqədi ərazisində avtoservisi ya kafesi olan Vüsal adlı şəxsi tanıyıb-tanımadığını? soruşub. Təxminən 1 km-dən sonra Mübariz bacısı oğlu Fuada maşından düşüb avtoservisə yaxınlaşmasını və orda Vüsal adlı şəxsin işləyib-işləməməsini soruşmasını tapşırıb. 1 dəqiqə keçməmiş Fuad servisin həyətindən çölə çıxıb, arxasınca dolu bədən quruluşlu bir nəfər gəlib. Mübariz qəfildən qapını açıb və həmin şəxsə doğru qaçıb. Bunu görən sonuncu tələsik geriyə, servisin həyətinə qayıdıb. Artıq tam əmin olub ki, qaçan şəxs Mübarizin axtardığı Vüsaldır. Bir neçə dəqiqədən sonra Mübarizlə Fuad servisdən bayıra çıxıb maşına doğru qaçıblar. O, şəhərin mərkəzinə tərəf hərəkət edib. Restoranın qarşısına çatanda o, sol yan güzgüdən qara rəngli “BMW 745” markalı avtomobilin onu sıxaraq ötmə əməliyyatı etmək istədiyini görüb. Həmin maşının sürücüsü qarşıdan gələn avtomobillərin yoluna çıxaraq sol tərəfdən ona yaxınlaşıb. Avtomobilin salonundan kiminsə qışqıraraq bir neçə dəfə “vur” sözlərini deməsini eşidib. Qabaq sağ oturacaqda əyləşən sərnişin atəş açıb. Güllə alın şüşəsindən daxil olaraq sağ qabaq qapının şüşəsini sındırıb bayıra çıxıb. Qəlpələr onun sol bilək və sağ əlini yaralayıb. Atəşdən sonra “BMW” geridə qalıb və yenidən sıra ilə hərəkət edib. Hadisədən yayınmaq məqsədilə sürəti artırıb. Atəşdən sonra Mübariz şokda olub və heç nə danışmayıb. Avtomobili arxadan yenə də möhkəm zərbə ilə vurulub və o, bir qədər də irəliyə doğru gedib şadlıq sarayının qarşısında tıxaca düşüb. O, Mübarizin də qaçacağını düşünüb və tez telefonunu götürərək, maşından çıxıb və yolun əks tərəfinə qaçıb. Əyildiyindən ağ köynəkli, üzünə fikir vermədiyi şəxsin atdığı yumruq ona dəyməyib. Məhəllələrin arasında bir qədər gizlənib. Oradan keçən insanların danışıqlarından eşidib ki, yolda bir nəfəri gülə ilə vurublar və həmin şəxs maşında ölüb.
 
Məhkəmə iclasında Taleh Cəlalov, Vüsal Hüseynov, Səxavət Hüseynov, İmran Bəbirov ittihamlar üzrə özlərini  təqsirli bilməyiblər.
 
Məhkəmə nəticəyə gəlib ki, Taleh Cəlalovun, Vüsal və Səxavət Hüseynovun Cinayət Məcəlləsinin 120.2.1-ci (qabaqcadan əlbir olan bir qrup şəxs tərəfindən qəsdən adam öldürmə), 120.2.4-cü (xüsusi amansızlıqla qəsdən adam öldürmə), 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə), 228.1-ci (qanunsuz olaraq odlu silah əldə etmə, satma və ya gəzdirmə), 229.1-ci (qanunsuz olaraq odlu silah təmir etmə) və İmran Bəbirovun CM-nin 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə nəzərdə tutulan cinayət əməllərini törətmələri tam sübuta yetirilib.
 
Bakı Ağır Cinayətlər Məhkəməsinin hökmü ilə Taleh Cəlalov və Vüsal Hüseynov 17, Səxavət Hüseynov 16, İmran Bəbirov 4 il müddətinə azadlıqdan məhrum olunublar.