Avropanın möhtəşəm Alp zirvələrindən tutmuş Atlantik okeanı üzərində ucalan vulkanik dağlara qədər bu qitə unudulmaz piyada marşrutlar təqdim edir.
Lent.az xarici mediaya istinadla xəbər verir ki, turizm ekspertləri bu il diqqət yetirilməli olan, heyrətamiz mənzərələrə malik Avropanın beş ən yaxşı piyada marşrutunu seçiblər.
Onların sözlərinə görə, Avropada elə cığırlar var ki, hər addımda yeni bir mənzərə açılır: bir an vəhşi dağ vadilərində irəliləyirsiniz, növbəti an buzlaqlara, gizli göllərə və ya yerli mətbəxin məşhur yeməklərinin təqdim olunduğu rahat dağ sığınacaqlarına tamaşa edirsiniz.
Birinci marşrut Tur du Monblandır və Fransa, İtaliya və İsveçrə ərazisindən keçir. Təxminən 170 kilometr uzunluğunda olan bu yol adətən 7-11 günə qət olunur və orta çətinlik səviyyəsinə malikdir. Bununla belə, marşrutu hissə-hissə də keçmək mümkündür.
Bu, Avropanın ən məşhur uzunmüddətli yürüş marşrutlarından biridir və burada turistlər üç fərqli mədəniyyətlə tanış olurlar. Marşrut boyunca mənzərələr daim dəyişir: bir gün çiçəklərlə örtülü alp çəmənliklərindən keçirsiniz, növbəti gün isə buzlaqlara açılan dağ keçidlərini aşmalı olursunuz.
İkinci marşrut Portuqaliyaya aid Azor adalarında yerləşən Piku dağıdır. Təxminən 8 kilometrlik bu yürüş 7-9 saat çəkir və orta çətinlikdədir. Bu, Portuqaliyanın ən yüksək nöqtəsi hesab olunur. Yol vulkanik qayalar üzərindən keçir və yüksəldikcə ətraf mənzərə daha da təsirli olur. Açıq havada qonşu adaları okeanın fonunda görmək mümkündür və zirvəyə çatdıqda sanki Azor adalarının damında dayanmış kimi hiss edirsiniz.
Üçüncü marşrut İsveçrənin Zermatt bölgəsi yaxınlığında yerləşən Beş göl yürüşüdür. Uzunluğu 11,3 kilometr olan bu marşrut təxminən 3-4 saata qət edilir və orta çətinlikdədir. Yol boyunca beş alp gölü ilə qarşılaşılır və bəzi günlərdə bu göllər Matterhorn dağının əksini göstərir. Marşrut nisbətən asandır və əksər turistlər üçün uyğundur, buna görə də Alp dağlarını daha rahat şəkildə kəşf etmək istəyənlər üçün ideal seçim sayılır.
Dördüncü marşrut İtaliyanın məşhur Cinque Terre milli parkında yerləşən Mavi cığırdır. Təxminən 12 kilometrlik bu yol beş məşhur kəndi – Monterosso, Vernazza, Corniglia, Manarola və Riomaggiore-ni birləşdirir. Cığır qayalı sahillər boyunca uzanır və Aralıq dənizinə möhtəşəm mənzərələr təqdim edir. Yol boyu üzüm bağları, dar küçələr və yerli kafelər turistlərə həm təbiət, həm də italyan həyat tərzindən zövq alma imkanı yaradır.
Beşinci marşrut Xorvatiyada yerləşən Plitvice Lakes National Park ərazisindədir. Bu park UNESCO-nun Dünya İrsi siyahısına daxildir və firuzəyi gölləri, şəlalələri və taxta cığırları ilə məşhurdur. Marşrutun uzunluğu seçilən istiqamətdən asılı olaraq 8-18 kilometr arasında dəyişir və olduqca asandır.
Turistlər burada meşə içində, kristal təmiz su üzərindən keçən taxta yollarla gəzərək təbiətin nadir gözəlliklərini kəşf edirlər. Suyun rəngi işıqdan asılı olaraq tünd mavidən parlaq yaşıl tonlara qədər dəyişir.
Sonda qeyd olunur ki, piyada yürüşə çıxmazdan əvvəl düzgün hazırlıq çox vacibdir. Bir çox turist haykinqi asan hesab etsə də, hətta bir günlük yürüş üçün belə uyğun geyim və ayaqqabı seçmək, həmçinin fiziki hazırlıq səviyyəsini düzgün qiymətləndirmək lazımdır. Qrup halında yürüşlər zamanı isə əlavə təhlükəsizlik və təşkilati məsələlərə də diqqət yetirilməlidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
