Dnepropetrovsk vilayətindən Bakıya təyyarə reysi açılır

İyunun 6-da Ukraynanın Dnepropetrovsk vilayətindən Bakıya şəhərinə yeni təyyarə reysi açılacaq. ”Dniproavia” şirkətindən Lent.az-a verilən məlumata görə, Dnepropetrovsk vilayətində yaşayan soydaşlarımızın çoxsaylı müraciətinə əsasən açılan Dnepropetrovsk-Bakı, Bakı-Dnepropetrovsk təyyarə reysini “Dniproavia” kompaniyası həyata keçirəcək.

Ukrayna Azərbaycanlıları Konqresinin Dnepropetrovsk Vilayət təşkilatının sədri Qüdrət Hacıyev bildirib ki, yay mövsümündə belə təyyarə reysinin açılması vilayətdə yaşayan 30 mindən çox azərbaycanlının, xüsusən də Şərqi Ukraynada təhsil alan minlərlə azərbaycanlı tələbənin vətənə gediş-gəlişinin asanlaşdırılmasında mühüm rol oynayacaq. Onun sözlərinə görə, Dnepropetrovsk-Bakı təyyarə reysi həmçinin Xarkov, Zaporojye, Donetsk, Poltava və Sumı vilayətlərində yaşayan minlərlə soydaşlarımıza da xidmət edəcək. Şərqi Ukraynada yaşayan soydaşlarımız Vətənə getmək üçün hökmən 600-700 km məsafə qət etməklə məcburən Kiyev-Bakı təyyarə reysindən istifadə edirdilər.

”Dniproavia” şirkətindən verilən məlumata görə, Dnepropetrovsk-Bakı təyyarə reysi ilkin olaraq uçuşlarını iyinun 6-dan başlayaraq hər həftənin şənbə günü yerli vaxtla səhər saat 07:30-da Dnepropetrovsk şəhərindən, 14:10-da isə Bakıdan həyata keçirəcək.

Kompaniya sərnişinlərin tələbinə uyğun olaraq iyul ayından etibarən reysin sayını həftədə 2 dəfəyə qaldırmağı da nəzərdə tutub. Yeni təyyarə reysinə bilet almaq istəyən sərnişinlər dniproavia.com saytına və istənilən aviabilet satışı agentliklərinə müraciət edə bilərlər.