Tarixi abidələrin pasportlaşdırılmasına başlanıldı

İlkin mərhələdə 234 tarix və mədəniyyət abidəsinin pasportlaşdırılacaq.

Azərbaycanda mövcud olan tarix və mədəniyyət abidələrinin pasportlaşdırılması işinə başlanılıb. Lent.az-a verilən məlumata görə, mədəniyyət və turizm nazirinin müvafiq tapşırığı ilə "Azərbərpa" Elmi-Tədqiqat Layihə İnstitutu tərəfindən beynəlxalq standartlara cavab verən yeni pasport nümunələri hazırlanıb və onlara Azərbaycan Milli Elmlər Akademiyasının müvafiq institutları tərəfindən müsbət rəy verilib. İlkin mərhələdə 234 tarix və mədəniyyət abidəsinin pasportlaşdırılması nəzərdə tutulub.

Qeyd edək ki, ölkəmizdə mövcud olan tarix və mədəniyyət abidələrinin ilk dəfə olaraq kütləvi şəkildə pasportlaşdırılması işi 1970-1980-ci illərdə aparılıb. Bu müddət ərzində 1000-dən artıq abidənin sənədləşdirilməsi həyata keçirilib.

Azərbaycan Respublikasının Nazirlər Kabinetinin 2 avqust 2001-ci il tarixli 132 nömrəli qərarı ilə təsdiq edilmiş dövlət siyahısında dünya, ölkə və yerli əhəmiyyət dərəcələrinə görə qruplaşdırılan 6308 tarix və mədəniyyət abidəsi yer alır. Bundan əlavə təxminən 2000-ə yaxın yeni aşkar olmuş statusa malik olan abidə vardır ki, hazırda onların siyahılarının dəqiqləşdirilməsi aparılır.