Sevinc Vaqifqızı ilə "Ana xəbər" bloku – 31 Mart

Ukrayna defolt ərəfəsindədir və ciddi müdaxilə olmasa ölkə iqtisadiyyatının çöküşü rəsmiləşəcək. Ehtimal böyükdür, ən azı ona görə ki, indiyə kimi Corc Sorosun defoltla bağlı bütün xəbərdarlıqları özünü doğruldub. Bu baxımdan amerikalı milyarderin Ukraynada defolt olacağı barədə xəbərdarlığına ciddi yanaşmaq lazımdır. Sorosun bu xəbərdarlığı Ukrayna hökumətinə deyil, Qərbə ünvanlanıb. O hesab edir ki, Avropa İttifaqı yıxılan Ukraynaya dayaq olmasa, bu ölkəni birdəfəlik itirə bilər. Avropanın sadəlöhvlüyü Sorosu belə özündən çıxarıb. Adam haqlıdır, onun fikirlərində yalnız bir məqam mübahisəlidir – Avropa Ukraynanı itirə bilər, yoxsa artıq itirib? “Qazprom”un qəfildən Ukraynaya mavi yanacağı güzəştli qiymətlərlə satmaq qərarı göstərir ki, Ukrayna Avropa üçün “itib”lə “itmək üzrə” arasındadır. Rusiya daha bir belə addım atsa, defolt ərəfəsində olan ölkə üzünü Qərbdən Şərqə çevirəcək. Eh, Avropa, Avropa...