Quba hadisələri ilə bağlı növbəti məhkəmə prosesi keçirilib
07 fevral 2013 22:03 (UTC +04:00)

Quba hadisələri ilə bağlı növbəti məhkəmə prosesi keçirilib

Fevralın 7-də  Xaçmaz Rayon Məhkəməsində hakim Quba hadisələrində təqsirləndirilən jurnalistlərin və digər 4 nəfərin cinayət işi üzrə məhkəmə prosesi davam edib. APA-nın şimal bürosunun verdiyi məlumata görə, prosesdə şahidlər ifadə verib. Prosesdə “Xəzər” televiziyasının bölgə müxbiri Emin Kərimov, “Xəyal” televiziyasının əməkdaşları Zaur Mustafayev, İslam Aslanov, “Kanal 13” internet televiziyasının əməkdaşı Binəli Tosoyev və polis əməkdaşı ifadə verib.

 

Təqsirləndirilən şəxs V.Qonaqov şahid ifadələrinin video lentə alınması barədə vəsadətlə çıxış edib. Hakim vəsadəti təmin etməyib.

 

Proses fevralın 8-i  davam etdiriləcək.

 

Qeyd edək ki, Quba hadisələrinə görə saxlanılan şəxslərdən Quba şəhər Bələdiyyəsinin sədri Elxan Əliyev, “Xəyal” televiziyasının icraçı direktoru Vüqar Qonaqov, televiziyanın baş redaktoru Zaur Quliyev, Zakir Məmmədov, Gülağa Əliyev Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və bu cür hərəkətlərdə fəal iştirak etmə) və 309.2 ( vəzifə səlahiyyətlərini aşma) maddələri ilə, Muxtar Ələkbərov isə CM-in 186.2.2 (əmlakı qəsdən məhvetmə və ya zədələmə - yandırmaqla, partlatmaqla və ya başqa ümumi təhlükəli üsulla törədildikdə və ya ağır nəticələrə səbəb olduqda), 233 (ictimai qaydanın pozulmasına səbəb olan hərəkətləri təşkil etmə və bu cür hərəkətlərdə fəal iştirak etmə), 315.2 (hakimiyyət nümayəndəsinə qarşı müqavimət göstərmə və ya zor tətbiq etmə) maddələri üzrə təqsirləndirilirlər.

 

Ötən il martın 1-də Qubada İcra Hakimiyyətinin başçısı Rauf Həbibovun istefası tələbi ilə etiraz aksiyası keçirilib. Aksiya toqquşmalar və zorakılıqla müşayiət olunub. İcra Hakimiyyətinin yardımçı binaları, İcra Hakimiyyətinin başçısı Rauf Həbibovun evi yandırılıb.

 

# 826
avatar

Oxşar yazılar