"Qərbin ikili standartlarını Xocalı soyqırımına yanaşmada gördük" - Qənirə Paşayeva

Millət vəkili, siyasi elmlər doktoru Qənirə Paşayeva Türkiyənin Elazığ vilayətində “15 Temmuz və Vatan” adlı konfransda çıxış edib. Lent.az-ın məlumatına görə, tanınmış araşdırmaçı-yazar İmdat Avşarın moderatorluğu ilə keçən konfransda Q.Paşayeva Qarabağ problemi, Ermənistanın işğalçılıq siyasəti, qərbin ikili standartları və birliyin önəmi mövzusunda geniş məruzə edib.

Dağlıq Qarabağ münaqişəsindən danışan millət vəkili bu məsələdə Qərbin və beynəlxalq təşkilatların ikili standartlarını kəskin qınayıb: “Bu gün BMT başda olmaqla beynəlxalq təşkilatlar bir neçə böyük dövlətin maraqlarının müdafiəsindən başqa heç bir işlə məşğul olmur. Ermənistanın işğal etdiyi Azərbaycan torpaqlarının azad edilməsi ilə bağlı qətnamələr var, amma onların həyata keçirilməsi üçün Ermənistana heç bir təzyiq göstərmir. İnsan haqlarından danışan beynəlxalq təşkilatlar Ermənistanın işğalçılığı üzündən öz evinə dönə bilməyən 1 milyon azərbaycanlı qaçqın və məcburi köçkünün haqlarının müdafiəsi istiqamətində heç bir addım atmır. Biz Qərbin ikili standartlarını Xocalı soyqırımına yanaşmada da gördük”.

Millət vəkili tədbir iştirakçılarına Türkiyədə yeni çapdan çıxmış kitabları “Turan yolçusu” və “Aşk yolçusu”nu imzalı hədiyyə edib.