Qalib əlillər mükafatlandırıldı

Əmək və Əhalinin Sosial Müdafiəsi Nazirliyi tərəfindən keçirilən Əlillərin VI Ümumrespublika Bədii Yaradıcılıq Baxış-müsabiqəsinin qaliblərinə diplom və mükafatların təqdim edilməsi mərasimi olub. Bu barədə Lent.az-a Əmək və Əhalinin Sosial Müdafiəsi Nazirliyindən məlumat verilib. Müsabiqədə bədii yaradıcılığın müxtəlif növlərini (muğam, mahnı və romans, instrumental ifaçılıq, bəstəkarlıq, rəqs və bədii qiraət, poeziya) əhatə edən 4 nominasiya üzrə I yerə layiq görülmüş 8 nəfərə, II yerə layiq görülmüş 11 nəfərə və III yerə layiq görülmüş 12 nəfərə diplomlar və pul mükafatları təqdim edilib.

Eyni zamanda, qaliblər istisna olunmaqla, final mərhələsində iştirak etmiş 48 nəfər sağlamlıq imkanları məhdud uşaqlara həvəsləndirici diplom və pul mükafatları, habelə mükafata layiq yer tutmayan əlillərə fərqləndirmə mükafatı və təşəkkürnamələr verilib.

Noyabrın 30-da Dövlət Gənc Tamaşaçılar Teatrında Əlillərin VI Ümumrespublika bədii yaradıcılıq baxış-müsabiqəsi qaliblərinin iştirakı ilə yekun konserti keçiriləcək.