Nazirlikdən ŞOK müraciət: "Poçt ünvanlarınız təhlükə altındadır"

Rabitə və Yüksək Texnologiyalar Nazirliyinin (RYTN) Elektron Təhlükəsizlik Mərkəzi (ETM) Azərbaycan cəmiyyətinə qarşılaşa biləcəyi təhlükə ilə bağlı növbəti xəbərdarlığını elan edib. Nazirlikdən Lent.az-a verilən xəbərə görə, ETM-in ekspertləri bildirir ki, Azərbaycan əhalisi tərəfindən də geniş şəkildə istifadə olunan “mail.ru” internet ünvanlarının istifadəçiləri təhlükə ilə qarşı-qarşıyadır.

Rusiyanın ən böyük e-poçt xidməti “mail.ru”-nun 4.6 milyon (4 664 478) istifadəçisinin istifadəçi adı və hesab şifrləri internetdə yayılıb. Bu şifrlərin 95 faizinin aktiv olmayan istifadəçi hesablarına aid olduğu bildirilir. Şirkət tərəfindən verilən açıqlamada isə qeyd olunur ki, hakerlər tərəfindən internetə sızdırılan bu şifrlər fərqli zamanlarda onlar tərəfindən ələ keçirilib. Oğurlanan hesabların 5 faizi isə şübhə altındadır və şirkət bir gün içində bu hesablara xəbərdarlıq mesajı göndərəcəyini bildirib.

Həmçinin qısa müddət öncə 1 milyona yaxın “Yandex” istifadəçilərinə aid hesab şifrləri də internetdə yayımlanıb.

Eyni zamanda 5 milyona yaxın (4 929 090) “Gmail” və digər “Google” xidmətləri istifadəçilərinin hesablarının da təhlükə altında olduğu qeyd edilir. Məlumat bazasının aktuallığı tam təsdiq olunmayıb. Ancaq qeyd olunan 60 faiz e-poçt hesabının aktiv olduğu bildirilir. “Google”-dan verilən məlumata görə, məsələ hazırda araşdırılır.

ETMərkəzi isə öz növbəsində, e-poçt hesablarınızın şifrlərini tez bir zamanda dəyişməyinizi və kompüterlərinizdə olan antivirus proqramını işə salmanızı tövsiyə edir.